Va mignon, Yannig Lazenniek,
A zo bras ha leun a c’hloar ; (bis)
Mez en deus o komz brezoneg,
Ha ger galleg mat ne oar.
Diskan
Foei warnan gant e vern ardou,
Galleg sot leiz e c’henou !
Pa ’z an gantan d’ar pardoniou
Ne fell ket d’am c’hamarad (bis)
Gant aoun da freuza e c’henou,
Komz er yez a gomz e dad.
Bet omp e pardon Keraez,
O redek ar staliou kaer ;
Me oa tapet genaouegez
E kichen ma Yannig kouer !
Dirak peb stal e lavare :
— « Regard’ comm’ chê bo tout ca !
« Jeannett’, je vais te régalé,
« Prends tout che que tu voudras ! »
Ha pa grogen en dister dra :
— «Laiché cha, viens donc plus loin. »
Hag erru e ti Jaketa :
— « Rentrons pas dans che chal coin ! »
Prena ’ra koz soniou gallek
’N eur grial : « Chê ben, chê bon ! »
Pa ginniger d’ean brezoneg :
— « Je sais pas lir’ du breton. »
Savet droug, pelloc’h, ennon-me,
E prenis seiz kanaouenn,
Ha me rei e zac’h d’an den-ze :
— « Kerz d’ar gêr da zeski lenn.
« Mez em eus ganez, pladennek,
« Ha te savet er vro-man
« A ra fae war ar brezoneg,
« Goude n’ouzout nemetan ?
« ’N deiz bennak, me, ma timezan,
« N’ roïn ket d’id-te ar maout ;
« Gwelloc’h ganen kaout eur pagan,
« Eur pastor pe eur paotr saout. »
M’ho pije gwelet ma lapous,
An daelou ’n e zaoulagad,
O vont kuit, lostek ha pikous,
C’hoarzet ho pije m’oar vat.
Grit eveldon, merc’hedigou,
Ha c’houi welo a bep tu
Kement hini a zoug bragou
O komz brezoneg dioc’htu.
Pa ’z eus diou yez e Breiz-Izel,
Evit ma ’z ay mat an traou,
E vo red deomp en eur zevel
O deskit, ervat, o diou.
Ha ma rankit komz e galleg,
Na gomzit ket hini plat,
Ha pa gomzoc’h e brezoneg,
Distagit brezoneg mat.
|
