Trizekved pennad — III

Eus Wikimammenn
Mont d’ar merdeerezh Mont d’ar c’hlask
R. Prud’homme, 1903  (p. 339-343)



III


Al lestr war helpenn : Son an drouk-mor.


D’al lun ar 16ed a Wengolo. — Pa dihunan en em zantan luskellet. N’eo ket, avad, ’vel eur bugel en e gavel : n’eo ket euz an eil tu d’egile, med euz an eil penn d’egile. Gwech e sav ma fenn uheloc’h, ha gwech e tisken izeloc’h evit ma zreid, Daoust *ta petra a c’hoarve d’al lestr ? Oh ! ezet eo hen gout. ’Michans eman o « tankan » herr da m’hall, ’michans eo ar mistral a gemer ’nean a benn hag a lak anean da zansal evel-se.

« N’euz forz ! e sonjan ennon ma-unan : bepred e savin. Red eo d’in gwelet hag-eñ eo ken drouk an autro « keravel » pa c’houe a benn, ha pa c’houe a goste, hag-eñ e c’hourdrouz kement al lestr d’ar boull-galon pac’h a war helpenn ha pa ve o kosteenni. »

Ha me raktal e-traou euz ma gwele. Bec’h o deuz ma zreid o chom er pal. Koulskoude e teuan a benn d’en em wiskan. Goude e savan e-kroec’h gant ar *viñz hag e ran eun dro war ar pont. Na gavan ket re diæz ar c’herzet ha, ’n em c’hreiz, sav-kalon e-bed.

Setu me dinec’h : gellout a rin ofernian. Fe, hen ober a ran hep poan. Mad aoalc’h ive ar vintinvez. Petra bennag e oaran breman ’n em gemer ’vit pellaat diouzin an drouk vil : red eo ’n em didui. Ha ma didu eo ober anei gantan. Eur zon a skrivan diwar e benn, ’n eur vouskanan ’nei war unan euz tonio Marc’harit Fulup : ton an drei, drei, drei. ’Vel hini Fransoasik ha Pierik, hon deuz laket warnan gwerz ar C’horsik, ec’h eo bet tapet ha skrivet an ton-man gant an Autrone Gwegan ha Derriennik, kelennerien en kolaj Gwengamp. C’hwel ’nean aman warlerc’h gant ar zonik.



SON AN DROUK MOR


————


war don : O drei, drei, drei !



\version "2.18.2"
\score {
 \new Staff {
  \relative c''{
    \clef treble
    %\autoBeamOff
    \key c \major
    \time 2/4
    \partial 4*1
    \override Rest #'style = #'classical
    g8 g16 g | \stemUp c8 c g g | c c \stemNeutral c e | \break
    d d d c | \stemUp c b a a | g4 g8 g16 g | \break
    c8 b a b | c4 r \bar "|."
    }
    \addlyrics{
    N’hanv da Dou -- e, ma mi -- gno -- ned, pa
    vin -- me klanv, deut d’am gwe -- let, O drei, drei, drei.
    Pa vin -- me klanv, deut d’am gwe -- let.
    }
 }
 \layout { 
    indent = #00
       line-width = #125
    %  ragged-last = ##t
  }
  \midi {
    \context {
      \Score
      tempoWholesPerMinute = #(ly:make-moment 80 4)
    }
  }
}
\header { tagline = ##f }



Ar zonik-man am euz savet
War eun drouk ’m euz eur wech santet
O drei, drei, drei ;
War eun drouk ’m euz eur wech santet.

Bean ’zo eur oallen c’haro
’Sko ket koulskoude d’ar maro.

Na ro maro da zen e-bed :
Poan, a-wejo, na laran ket.

Dimeuz o zav e tiskar tud
’Vel delio sec’h an avel yud.

Eur c’hleñved eo euz ar vilan :
An drouk-mor a rer anean.


« Petra ’ch euz-hu, ma mignon ker,
« Pa vranskel d’ac’h ho *tivesker ?

« — N’ouzonn petra ’zo endro d’in,
« ’Met ve an drouk-mor o krigin.

« — War ho *tremm ’man liou ar maro :
» Me ’lar d’ac’h na n’oc’h ket faro.

« — Mezevenni a ra ma fenn :
« ’M euz aoun ’c’h in prestik war helpenn. »

N’eo ket e c’hir peurachuet
M’an euz dorn war galon laket.

« It d’ar gleud-tro, hag it *timad
Dizammet ho kalon da vad. »


Æt er-mæz dioustu-dak ar boed :
’Vit meur a besk danve eur pred.

Mes eun tammik sautret ar pont.
« Mousik, kæ da skuban du-ont. »

Hag endro ar skubelennik,
Ha dour da redek ’n eur oazik.

Hon c’hlanvour na n’eo ket vit harz,
Pa o gwel, d’ober eur mousc’hoarz.

« N’eo ket bet hir ma c’halonad ?
« Mes petra ’rin vit peuryac’hâd ?

« — Mont ’n ho kourve, chom hep finval,
« ’Keit ma vo al lestr o tansal.

« Pa vo koueet konnar ar mor
« Adarre ’po kalon digor. »

Bremaik e vo gant e bred
Hag heñ ken yac’h ha den e-bed.


War vor mar peuz da veaji,
Dioallet euz ar velkoni.

Bezet seder ’n em diduet ;
An drouk-mor d’ho kæ na n’ei ket.

Me, ’vit harz da hadkouean klan,
Am em savet ar zonik-man.


’Benn eo peurskrivet ganin ma zon, ec’h eo deut ar mor da zioulaat. Chom a rei sioul e-*trande.


————