Kaerat da zûn, sûn ar zalud !
Sûn dudius ma weler tud,
Goude o labour pemdeiek,
Bep noz, a-leiz, o tiredek
’Trezek o iliz vinniget,
Ewit kât bennoz an Hini
Er Zakramant ’n eus teurveet
Chom war an douar ganimp-ni.
Sûn ar zalud, kaeran hini
A zo er bla, ewidomp-ni,
Dreist oll, a gred ’man Mab Doue
Er Zakramant, korf hag ine !
En gwirione, ha bean ’zo,
Eur c’houlz all ken kaer ’pad ar bla,
Ma c’hall an den gwelet tro-zro
Bue ha kened en pep tra ?
Flouroc’h ne vo ket an delio
Na stankoc’h ive ar bleunio !
Ar boudenno spern-gwen bleuniet
Muioc’h a c’houez-vat ’strinkfont ket ;
Ne vo gant an evned bihan,
O tarnijal en-dro d’o nez,
Na muioc’h a fred nag a gân !
Sûn ebet kaeroc’h ’wit honnez !
Ha setu perak ar c’hleier,
E-pad ar zûn a gân seder ;
Kanan ’reont, hag o mouez
Eus lein an tourio, war ar maez,
A nij ’wit rei da c’hout d’an dud
E tosta ar c’houlz da lezel
Al labourio ’wit ar zalud
Ken karet c’hoaz en Breiz-Izel.
Koaniet gante, yaouank ha koz
Ac’h a d’ar bourk da glask bennoz
Ar Zakramant. A vandenno
E weler tud dre an hencho,
O dilhad sul gwisket gante ;
Darn, skanv o zroad, ac’h a fonnus,
Ar re goz gorek a vale,
Mes holl seder hag evurus !
Hag en o iliz dastumet,
Dirak an oter kempennet
Ha goulouet a vleun, joaus,
An holl a gân, a bed Jezuz.
Jezuz a ’n em blij, a gredan,
O vinnigan ar Gristenien
A deu da c’houlen digantan
’Vel-se bennoz ha sklerijen.
Bet ar zalud, ha deut serr-noz,
An holl ’darre, yaouank ha koz,
A distro d’ar ger evurus.
Daoust e ve et an heol da gus,
E chom c’hoaz eun ezen glouar :
C’houez-vat a zo ’hed an hencho,
Sioul eo pep tra war an douar,
Brao eo hunvreal en Nenvo !
|
