Levenez yaouankizo Breiz

Eus Wikimammenn
Sauter à la navigation Sauter à la recherche
Moulerez Sant-Gwilherm, 1909  (p. 48-49)



LEVENEZ YAOUANKIZO BREIZ
o deus fe, yec’hed ha frankiz.
————


Deut eo an hanv, an amzer ma weler,
En Breiz-Izel, a-leiz a vleun tener,
Ha ma klewer richan war ar maezio ;
Deut eo ar c’houlz ma krog ar pardonio

Ha bean ’zo eul levenez henvel
Ouz an hini a gav, en Breiz Izel,
An den yaouank a gar start, war eun dro,
Doue dreist-oll, e yez koant hag e vro ?

Ma kar Doue e ziwall ouz ar fall,
Bepret e vo en peuc’h ha didamall,
E lec’h tremen dre ar vouilhen, ar fank ;
Pegen evrus neuze an den yaouank !

Karout a ray ar ger ’lec’h e ganet,
’Lec’h e vewas e gerent tremenet,
Hag an hencho darempredet gante ;
Goude Doue, d’e vro e garante !

En Brezoneg e tiskas sin ar groaz,
Ha komz ive, pa oa bihanik c’hoaz ;
Gant Brezoneg, yez karet e dado,
Gwech-ha gwech-all, e galon a drido.

Rak nan eus ket eur yez war an douar,
Hag a hallfe, koulz hag hon yez dispar,
Trei ha distrei kalon eur gwir-Vreizad,
Lakat c’hoarzin ha gouelan, bep pennad.


Levenez c’hoaz ’nevo an den yaouank,
D’ar garante e galon digor frank,
O vont, o tont, e koulz ar pardonio,
Gant mignoned, en eur ganan sonio,

Sonio ar vro, gant tonio meurbet kaer,
A ray sklokal traouienno, meneier,
A lako skanv troad ar valeerien,
En eur lakat o c’halono laouen.

Ken brao ez eo, war douar Breiz-Izel,
Bale d’an hanv, ha gallout tôl eur zel,
’Kreiz an douar, war an traouienno glas,
Ha ’tal an aod, war gerreg ar mor bras !

Gwelet ar bleun hadet ken niverus
Dre ar prajo, ’us d’ar sterio trouzus,
Klewet an evn a gân erdan ma c’hall,
Ha kât disheol ’n hencho don ha tenval !

Gallout ober e-pad an abarde,
Goude ’r labour, tost d’ar ger, eur bale,
C’hoari ’c’hilhou, en disheol ar gwe glas,
C’hoari boulou, kant ha kant tra-all c’hoaz !

Gallout d’ar zul lezel ar labourio
’Wit mont d’ar bourk da ’heuilh an ofiso,
Gallout ive, rôk, goude an ofiz,
War ar beio laret : De Profundis !

Bewan evrus, lodenni gant re-all
Eur levenez gwirion ha didamall ;
Santout eo gwell karante ’leiz an dorn
Ewit nan eo arc’hant a-leiz eur forn !

O evurus tud yaouank Breiz-Izel
A vev ’vel-se en bro gaer o c’havel !
Breiz ewite a zo ’vel eur porched,
Porched an nenv, bro ar gwir evrusted !