Speret zakr ha divin
Oberennoù damheñvel pe handelvoù all zo ivez, gwelout Spered santel Doue.
Hon Zalver a oa ganet da hanter-noz. An ele a ganas en oabl, ba meserien loenet a luskas kenkent e-trezeg ar c’hraou. — Miz Genver eo miz ar Mabik Jezus. — Amzer an Nedelek ar Gristenien a blij deze klevet Nouëlenou, evel ar re-man.
1. Speret zakr ha divin, m’ho ped reit d’in ar c’hras
Da zisklerian erfad eur mister zo ken braz :
An donediges kaer a Jezus Mab Doue
Deut henoas war ar bed e-bars ar baourante.
2. Ec’h oamp pelzo amzer o c’hortoz anezan
Da zont war an douar evit hon rediman ;
Digouet eo an termen ma vezimp dinec’het,
Ganet eo e Bethlem gwir Redemptor ar bed.
3. An Env hag an douar o welet ar bugel
A drid gant levenez en eur ganan Nouël !
Klevet a rer en oabl mouejou ar Barados,
Hag eur sklerder dispar a splann e kreiz an noz.
4. En parkou Bethleem eun èl a ziskenas :
« Setu neventi gaer, kaeran zo bet biskoas,
« Dihunet, emezan, ha zavet, pastoret,
« Ganet eo ho Salver, et d’ar c’hraou d’hen gwelet. »
5. Pa glev ar bastoret gant an èl ar mister,
Penos ema ganet o Mest hag o C’hrouer,
E lezont o denvet war ar roz da beuri
Evit mont trezeg kèr raktal d’hen adori.
6. Na oa ket skler an de pa gavjont anezan
Ebars eur marchosi hep na goulou na tan,
Na mezer na lian n’en devoa war e dro,
Nemet gouris e vam, netra ken d’hen golo.
7. Hag he ol d’an daoulin tro-war-dro d’ar c’havel,
O laret o feden hag o kanan Nouël !
Rei a rejont dezan, vel merk a garante,
Peb hini e brezant herve o faourante.
8. Me ho ped, ol boblou, heuillet ar bastoret,
Adoret ho Krouer war ar plouz astenet ;
Zonjet en e gichen e renko pa vo braz
Asten e izili evidoc’h war ar Groaz !
9. E baourante zo koz d’hon ol binvidiges,
Deut eo d’hon c’honforti dre e zempladures ;
Hon c’halon a c’houlen evit repoz en-hi,
Glac’har braz en defe mar ve kollet hini.
Diskan war don : Jesu dulcis memoria, N° 116.
Nouël, Nouël, Mabik-Jezus,
Ken koant ha ken karantezus :
Ni hoc’h ador en ho kavel,
Hon joa zo braz : Nouël ! Nouël !