Sketla Segobrani vol1/Rann 27
War-lerc’h bagad Dumnos, mab Bitus, e teuas eur c’houec’hvet bagad, renet gant Sagroviros, mab Magalos [1]. Ambrouget gand an tourc’h-gouez Kalido [2], ez eas da anneza, en tu-hont d’an douarou dalc’het gant bagad Nemetos, war ziou c’hlann ar Vimina [3] ha war glann-reter ar Visuria [4]. Trec’hi a rejont d’ar Skaled, hag o argas ha sevel kêriadennou ha krenvlechiou war glannou an diou stêr-ze. A bemp mil paotr hag a bemp mil plac’h yaouank e c’hoarveze ar bagad-ze, ha setu aman anoiou ar c’hêriadennou hag ar c’hrenvlec’hiou a voe savet ganto : Verdunon « ar C’hastell bras », Arotreba « trev an arerien ? », Dêvobrivodunon « kastell Pont an doueed », Dêvoduron « bourc’h an Doueed », Nemetoduron « bourc’h an Neved (nemeton) pe ar Vourc’h sakr (nemetos) », Markoritus « roudour ar Marc’h ».
- ↑ Sagroviros « gour (gwaz) krenv ». D’Arbois, Grammaire celtique, p. 3. — Magalos (IIIvet kantved kent H. S.), Magilos (IIvet kantved kent, IIvet kantved goude H. S.), Maglos (IIIvet kantved-VIIvet kantved), Mail (VIIIvet-IXvet), Mael (IXvet-XIIIvet), mel « pikol, bras » (XIIIvet-XXvet), D’Arbois, Etudes grammaticales sur les langues celtiques, Phonétique et Dérivation bretonnes, p. 2-4.
- ↑ Pe Kaledo, Rhys, Celtic Britain (pevare mouladur), p. 285. E barzoneg Claudianus gouestlet da Stiliko, ez eo skeudennet Galia evel eur vaouez bleo melen, eun dro-c’houzoug aour gwidilet en he c’herc’hen ha daou c’hoaf-bann en he dourn ; Brittia evel eur plac’h vrizellet, gwisket gand eur sae c’hlas, ha, war he fenn, da gabell, eur penn houc’h gouez, Rev. celt. 1901, p. 153-9.
- ↑ Vimina, hizio ar Wümme, bro-Hanovr. Diwar-benn an ano-ze, sellout ouz D’Arbois, Premiers Habitants, II, p. 176-7.
- ↑ Diwar-benn keltelez an ano-stêr-ze, Rev. celt. 1920-1, p. 283 ; Rev. archéol., ebrel-mezeven 1921, p. 119.