Pevare Cantic. Var ar guir voyen da ober ur gonfession vad

Eus Wikimammenn
Sauter à la navigation Sauter à la recherche
J.-B. Lefournier, 1836  (p. 21-25)




PEVARE CANTIC.


Var ar guir voyen da ober eur Gonfession vad. Var an ton, M’ho c’hador va Doue, va c’hrouer.



Clevit entrezoc’h pec’heurien,
Ha desquit oll ar guir voyen
D’en em lacat e graç Doue,
Ha da savetei hoc’h ene.

Evit en em lacat e stad
Da ober ur binigen vad
Hac ur Gonfession sincer,
Ar pemp tra-mâ zo necesser.

Da guenta oll gant dilijanç
Examina ho coustianç,
Evit anaout an offançou
Oc’h eus great enep oc’h Autrou.

D’an eil, er galoun caout regret
Da veza Doue offancet.
D’an trede, en em broposi
Na zistrôt mui d’e offanci.

D’ar pevare, antieramant
Coves ho pec’het humblamant,
Hep nac’h netra gant nep seurt mez,
Hac o lesel peb digarez.

Goudeze ober d’ar pempet
Quement a vezo ordrenet
Gant ho Confessour ; er c’his-se
En em lequeot e graç Doue.

Mæs evit anaout ho pec’het
Ha caout anezan guir regret,

Ho pezet recour da Jesus,
D’e vam, d’oc’h eal, d’ar sent eürus.

Neuse-ta, pizza ma c’hellot,
Hep faot en em examinot
Var an dec gourc’hemen Doue,
Ha var re an Ilis goude.

En em examinit ivez
Var an œuvrou a drugarez ;
Var ar seiz pec’het capital
Sourcen eus ar pec’hejou all.

Goude m’oc’h eus anavezet
Guella ma ellit ho pec’het,
Concevit e creis ho calon
Ur guir gueus ha contricion.

Detestit oc’h ingrateuri
En andret Jesus Map Mari,
Zo bet en oc’h andret quer mad,
O squilla evidoc’h e c’hoad.

Mar santit c’hoas criz ho calon,
Grit stard oud Doue Orœson,
Ma pligeo ganta he boucâd
Hac e digaç pelloc’h da vad.

Considerit eo ar pec’het,
Ar brassa droug a so er bet ;
Hac e ve guell e beo devi
Eguet na ve jamæs pec’hi.

Peguement bennac ma seblant,
Goude pec’hi marvelamant,
E veac’h leun a vuez ato,
E zouc’h en oc’h ene maro.

Chasseal a rit eus oc’h ene
Dre’r pec’het marvel ho Toue ;

Jesus-C’hrist a zisenorit,
Hac a nevez er c’hrucifiit.

Rac-se deiz ar varn diveza,
Jesus ho chasseo diounta
D’an ifern gant an dud collet
Ac an diaoulou milliguet.

Va Doue, me a ene ervad
Ez-oun bet ouzoc’h un ingrat ;
Hac em eus cals oc’h offancet,
Daoust peguer mad ouc’h em andret.

Ma am’eus glac’har em c’halon
O c’hout pe guer maleürus oun
D’ho peza, siouas ! outraget,
Va Doue, dîn da veza caret.

Protesti a ran da dec’het,
Gant ho sicour dious ar pec’het,
Ha dious an occasionou
A zo quiriec d’am disurzou.

O veza en em examinet
Hac ho pec’hejou detestet,
It gant eur guir devocion
Da ober ho confession.

Livirit franc ar viryonez
Hep nac’h netra ounta gant mez ;
N’ho pet quet aoun d’en em accus,
Ha na zuit quet d’en em escus.

Covessait ho pec’het epquen,
Hep lavaret drouc eus a zen,
N’en-em zaleit quet da gonta
Ar pez na servich da netra,

Discleryit ar circonstançou
A geinch ar speç eus ho crimou,

Hac ar re a zeu do c’hresqui,
Ha mêmès d’o diminui.

Ouc’hpenn e renquit lavaret
Pet gueich oc’h eus great pep pec’het
An niver just ma na ouzoc’h,
Livirit mui pe vianoc’h.

O veza gant contricion
Great guaneoc’h ho confession,
Echuit ho Confiteor,
Ha selaouit ho Confessor.

Evez bras a dleit da lacât,
Da glevet quement avis mad
A roï deoc’h aberz hor Salver ;
Recevit-hi gant douçder.

Ha m’ar caff e ve a-propos
E profit oc’h ene gortos
Hep rei deoc’h c’hoas an absolven,
Consantit gantâ hep anquen.

Rac ma na veac’h quet disposet
Da veza neuse absolvet,
Er c’hontrol beo d’hoc’h absolvi,
Ne raë nemed ho condaoni.

Rac-se m’ar bez deoc’h ordrenet
Dont ur veach all, na vanquit quet
Oc’h ober gant fidelite
Quement so dleet varben neuse.

M’ar oc’h eus nicun offancet,
Dicryet, pe desobliget,
Grit dezan satisfaccion
Ha goulennit ountâ pardon.

M’ar ac’h eus un dra quemeret
Pe viret hep ræson ebet

E reot ho possubl da renta
D’e berc’hen, ar c’henta-r-guella.

M’ar douc’h dre valeur engaget,
En occasion d’ar pec’het,
A grenn e renquit ê zerri
Hac en em bellât diouti.

D’ar fin m’ar d’ouc’h acustumet
Da goumetti nep seurt pec’het,
N’en-em espernit è nep tra
Evit dont d’en em gourrija.

Goude receo an absolven,
Na vanquit quet d’ho pinigen ;
Hac impligit ar remejou
Necesser ous ho pec’hejou

Chetu eno ar guir fæçon
D’ober ur guir Gonfession ;
Er guis-se en-em lequeot è stad
D’ober ur Gommunion vad.