Pajenn:Perrot - Bue ar Zent.djvu/736

Eus Wikimammenn
Sauter à la navigation Sauter à la recherche
Adlennet eo bet ar bajenn-mañ



Pempvet devez warn-ugent a viz Here


Sant Gouenou
Eskob (VIet kantved)


Sant Gouenou


Tudoghil eo ar c’hentan Breizad a zo bet hano anezan en Bro-Leon. En em gaout a reas er vro en blaveziou kentan ar VIet kantved, ha sevel a reas e di-bidi en kastel Gollob, en kreiz tre an Aber-Ac’h hag an Aber-Binniget. Bezan en devoa tri grouadur : daou bôtr, Gouenou ha Majan, hag eur verc’h, Tudona.

Majan a dreuzas an Aber-Benniget hag a yeas da chom el lec’h dudius m’eman breman c’hoaz ar chapel a zoug e hano.

Tudona a yeas da vevan pemp leo bennak ac’hane, en goueled ar C’hoad-Donan.

Gouenou a ziskennas etrezek Brest, hag a zavas e beniti ’n eul lec’h goue, diou leo diouz ar gêr-ze, en tu an hanter-noz. Ar roue Konomor, eun de ma oa o chaseal, a zigouezas gantan kouezan war Gouenou ; goulenn a reas digantan e hano, eus a be vro e teue, penôs e rê da vevan, ha dizro d’ar gêr, e tiskuilhas d’e dud santelez ar manac’h en devoa kavet oc’h ober e dro.