Pajenn:Morvan - Buez ar Zent, 1894.djvu/577

Eus Wikimammenn
Sauter à la navigation Sauter à la recherche
Adlennet eo bet ar bajenn-mañ
18 a Eost
569
sant hiasent

zek ar Rusii. Redet a reaz betek ar Mor Du, ha zoken betek ann Azii hag enezennou ar Gres, hag enn eurzont enn dro e chomas eur pennad e kear Kiovii.

Hogen, epad m’edo eno, eunn arme a Dartared, tud hanter-c’houez ha c’hoaz paian, a zaillaz var gear hag a lakeaz ann tan ennhi. Pa glev ar c’helou-ze, Hiasent a dec’h kuit gant he venac’h, enn eur zougen ar sibouer sakr enn eunn dorn hag imach ar Verc’hez enn he zorn all. Erruout ara evelse dirak eur ster ledan, ha n’euz pount na bag ebed d’he zreuzi. Mes ar Zant ne jom ket da varc’hata, hag a gerz var ann dour egiz pa vije bet var ar c’halet. He venac’h a dreuzaz ar ster var he lerc’h enn eur vale var he vantell en doa ledet dirazho var ann dour.

Goude beza labouret evel eunn abostol epad tost da zaou-ugent vloaz dioc’htu, Hiasent a glanvaz e Krakovii da zeiz gouel Introun-Varia-ann-Erc’h, Da zeiz gouel Maria-Hanter-Eost e resevaz he zakramanchou diveza, hag enn deiz-se zoken e roaz he ene da Zoue er bloaz 1257, d’ann oad a bevarzek vloaz ha tri-ugent.


SONJIT ERVAD

Ar zant-ma n’oa ket evit gouzanv e kollje eur begad euz he amzer. Amzer ar vuez-ma a zo berr hag a dremen buhan, ha goulskoude ann distera pennad euz ann amzer-ze a zo talvouduz meurbed, p’e guir e c’hell servichout d’eomp da c’hounit ar baradoz pe da greski ar rekoumpans a zo eno ouz hor gortoz. Bezit eta piz var hoc’h amzer, ha diouallit d’he implija, ne lavarann ket hebken oc’h offansi ann Aotrou Doue, mes c’hoaz e traou ha ne dalvezint d’ehoc’h da netra pa viot eat euz ar bed-ma.