Exaudivit Dominus deprecationem meam : Dominus orationem meam suscepit.
Erubescant et conturbentur vehementer omnes inimici mei : convertantur et erubescant valdè velociter.
Gloria Patri, etc. :
Beati quorum remissæ sunt iniquitates : et quorum tecta sunt peccata.
Beatus vir cui non imputavit Dominus peccatum : nec est in spiritu ejus dolus.
Quoniàm tacui, inveteraverunt ossa mea : dùm clamarem totâ die.
Quoniàm die ac nocte gravata est super me manus tua : conversus sum in ærumna mea, dùm configitur spina.
Delictum meum cognitum tibi feci : et injustitiam meam non abscondi.
Dixi : Confitebor adversùm me injustitiam meam Domino : et tu remisisti impietatem peccati mei.
Pro hac orabit ad te omnis sanctus : in tempore opportuno.
Verumtamen in diluvio aquarum multarum : ad eum non approximabunt.
Tu es refugium meum à tribulatione quæ circumdedit me : exsultatio mea, erue me à circumdantibus me.
Intellectum tibi dabo, et instruam te in via hac quâ gradieris : firmabo super te oculos meos.
Nolite fieri sicut equus et mulus : quibus non est intellectus.
In chamo et fræno maxillas eorum constringe : qui non approximant ad te.
