« Ia, ma Doue benniget ! enn desped d’am c’hozni,
Pa glevann lavarout : Breiz ! ma gwad a oar bervi ;
N’ounn ket maro c’hoaz eta ; ma bugalez nec’het
O devoa great, e Kemper, eur bez d'in re abred !…
« Ma iez a zo beo ivez e genou ar Vreiziz,
E desped da valloziou ann dud nai hag iskiz ;
Pa varvo ar iez kaer-ze, ez aio kuit ar Feiz :
Kenavo d’al lealded a zo hirio e Breiz.
« Pebez iez eo ma hini ! Leromp, enn eur dremen,
Eo nerzuz evel ann taol, kaled ’vel ann diren ;
Mad eo da c’hourc’hemenni ha mad da frealzi,
Kun ha treng eo pa gerer, n’ez euz ket evel-t-hi.
. . . . . . . . . . . . . . . . . . . . . . . . . . . . . . . . . . . . . .
