« Da dad a oa pabor warnezo koulskoude. »
« Mat. Divun d’in eun divunadenn :
- A c’holo an douar penn-da-benn
- Ha ne c’holo ket eur feunteun ? »
« An erc’h eta. »
- « Me am eus eun armelig wenn
- Hep toull-alc’houez na prenn ? »
- « Me am eus eun armelig wenn
« Eur vi. »
« O ! c’houi a oar kement hini. »
« Lavar atao. »
- « Eur gleuzenn fao put
- Leun a eskern-tud ? »
- « Eur gleuzenn fao put
« Hag a gig ivez ! Eur votez. »
« Petra eo an diaesa da zerc’hel war veg eun ibilh ? »
« An avel-draon. »
« N’ouzon nikun-all ebet ken. »
« Ma ! Divun d’in eun divunadenn, te ivez :
- Uhel pignet, fall wisket
- A laka ’r wrac’h da redet ? »
« Pignet uhel… gwisket fall… » eme Yann, « hag a laka ar wrac’h da redet… N’oun ket evit kompren. »
« Ma, ivez ! Ar c’hloc’h. Ha n’eo ket pignet uhel ? »
« Eo avat, en tour. »
« Ha gwisket mat eo ? »
« N’eo ket. Noaz-ran e vez atao. »
« Ha pa son ? »
« E red ar wrac’h koz… Gwir eo. »
« Unan-all c’hoaz : Perak e rank ar saout mont e-kichen ar c’hleuz da zisheolia ? »
« Abalamour ma klaskont eul lec’h fresk ha distan. »
« Diod ! Peogwir ne da ket ar c’hleuz d’o c’havout, e rankont mont en e gichen evit tostaat outañ. »
« Ma ! » eme Yann alvaonet.
« Kont kement-mañ : Tri bemp = pemzek, ha daou = seitek, ha tri = ugent. »
» Tri ha pemp a zo eiz ; ha pemzek a zo tri warnugent ; tri ha daou, pemp warnugent ; ha seitek, daou ha daou-ugent ; daou ha daou-ugent ha tri-ugent a zo daou ha pemp-ugent. Mat, daou ha kant. »
« Deuet eo ganez, » eme an daou-all o c’hoarzin ken a frail o genou.
« N’eo ket mat ar gont ? » eme Yann.
