Pajenn:Ar Prat - Mouez Reier Plougastell, 1905.djvu/69

Eus Wikimammenn
Mont d’ar merdeerezh Mont d’ar c’hlask
Adlennet eo bet ar bajenn-mañ
53
maro ar breur iann en eusa


V


MARO AR BREUR IANN EN EUSA

——


Kinniget d’he gerent.


War don : Map den sonjit.


Dreist ar mor braz, du-ze er gwagennou,
Me glev hirio son klemmuz ar glazou…
Petra Eusiz, petra ra d’eoc’h gwela ?
Perag ken trist ar c’halonou brema ?

Me vel e kanv iliz-veur ar barrez,
Gwisket e du eo oll dud an enez ;
Tristidigez a weler warnezho…
Livirit d’in : Piou eta zo maro ?

Daoust ar persoun, pastor oc’h eneou,
Pe ar mear mad, difennour ho kuiriou,
Zo bet skoet, diskaret didruez,
Evel ma vez kalz a re-all bemdez ?....

Hag e klevan, a-dreuz kalz a zaelou,
Oll dud Eusa, unanet ho moueziou,
Oc’h hirvoudi varzu tud an douar,
O lavaret gand ar vrasa glac’har ;