« Kemerit perz en hon zristidigez,
« Rag ar breur Iann, den leun a garantez,
« Eiz vloaz zo bet o ren skol ar baotred,
« Siouaz ! d’eomp-ni, ar breur Iann zo marvet !
« D’hor bugale, ar breur Iann oa eun tad,
« Kaloun dener, gand-ze eur mestr-skol mad ;
« D’ezho teske eaz an oll skianchou,
« Ha dreist peb-tra miret feiz ho zadou.
« Bez oa pell zo mignoun peb tiegez,
« D’an dud beac’hiet gwir frealzidigez,
« Nikun biskoaz na dec’haz dioutan
« Hep lavaret : « He lod en deuz em foan ! »
Ia, eneziz, lec’h oc’h euz da geuzia
D’ho Preur Rener, an den kalouneka ;
Hogen eun dra jomm c’hoaz d’eoc’h da ober :
Pedit ’vithan bemdez harz an aoter.
Kalounou baour, taolet ha distaolet
’Vel ar vagig war ar mor kounnaret,
En em daolit e Kaloun Zakr Jezuz,
Eienen c’hlan eüruzded peurbaduz.
Ebarz em c’hreiz va c’haloun zo goasket
Em daoulagad daelou puill zo savet…
Ah ! me ive, me gare ar Breur Iann,
E kanv an oll va ferz a gemeran.
