Karantez da genta

Henri Guillerm

Soniou Feiz ha Breiz

1930  (p. 63-64)

Karantez da genta

————

Dastumet gant H. Guillerm.

1

Janed a oa eur plac’hig koant,
Leun a furnez hag a skiant.
       Oh ! dansons, madirette,
       Joli garçon, madira dondon

2

Rak se he doa meur a vignon
A glaske gounit he c’halon.

3

Ar c’henta, mab eur miliner,
Hanvet er vro Job al Lonker.

4

An eil, Per, eur boutaouer koad,
Ha n’en doa nemet tri zroatad.

5

An trede, Farich ar mansoner,
Disto e benn ha friet berr.

6

Ar pevare, eur c’hrak-aotrou,
’N doa poan o tougen e vragou.

7

Ar pempet, eur martolod koz,
Eur reder merc’hed deiz ha noz.

8

Ar c’houec’hvet, Yann ar mesaer,
Godell c’houllo, kalon dener.

9

’C’hellit kredi, paotr an denved
A c’hounezas kalon Janed.

10

Merc’hedigou, kanit eta,
Klaskomp karantez da genta.

11

Gwell eo karantez ’leiz an dourn
Eged aour melen ’leiz ar fourn

12

Rag an aour melen ’vez rannet,
Hag ar garantez ne vez ket.

————