Pegen kaer out, va Breiz, gourizet gant ar môr,
War da zae bleuñ melen dre bep amzer digor,
Ha war da gerc’henn noaz dantelez meneou,
Hag en dro d’es spered eur vougenn hunvreou !
Pegen kaer out, va Breiz, dindan da goajou don
Leun a richan eostig hag hirvoudou kudon,
Lec’h ma klev da skouarn, e-kreiz klemm an avel,
Mouez an amzeriou bet damantus o sevel !
Pegen kaer out, va Breiz, war da lanneg garo,
Lec’h ma wask ar vein braz brezelourien varo,
Lec’h ma c’hall da spered, diroll ha dibreder,
Nijal beteg an néñv da heul an alc’houeder !
Pegen kaer out, va Breiz, e-deun da draouiennou,
Lec’h ma krén en dour sklêr prajou koant, flourennou,
Oc’hen braz o peuri, gwez uhel o tridal,
Ha stennet dindan-ê bolzou glaz ar bed all !
Pegen kaer out, va Breiz, war gribenn da vene,
Lec’h ma chom kréñv ar c’horf ha seder an ene,
Lec’h ma tispak tro-dro, skedusa kurunenn,
Kêriou gwenn, tourioù moan stlabeet er blenenn !
Pegen kaer out, va Breiz, en es yez birvidik,
Gwestl da drei pep menoz en gériou pinvidik,
Trec’h war gounnar an dud, trec’h war an holl bechou,
Divarvel o tiston a-dreuz d’ar c’hantvejou !
Pegen kaer e tiwan, va Breiz, war da zouar
Ilizou, kloc’hdier ha kalvariou dispar,
Chapeligou manek, kestel ha feunteuniou,
Graet gant ijin da dud ha roc’h da vengleuziou !
Pegen kaer out, va Breiz, gant da vibien kalet,
Da varvailhou gwechall kontet ’korn an oaled,
Ha da gredennou koz kizellet en es kreiz
Ken don ma tihanfes hep-ê da veañ Breiz !
Pegen kaer out, va Breiz, er berejou kousket,
Krog en diskuizadenn pad keit amzer klasket,
Ha dizoan o c’hedal, en disheol eus ar Groaz,
Eur vuhe peurbadus ’n eur Vreiz all kaeroc’h c’hoaz !
|
![\version "2.18.2"
\relative c'{
\time 6/8
\partial 8*1
\autoBeamOff
\override Rest #'style = #'classical
a'8 g4 f8 g4 a8 | a4. r4 a8 | d4 c8 d4 c8 | a4. r4 a8 | g4 f8 g4 a8 | \break
a4. r4 a8 | d4 c8 d4 c8 | a4. r4 g8 | a4 b8 c4 d8 | a4. g4 a8 | \break
e4 f8 d4 g8 | e4. r4 f8 | d4 e8 f4 g8 | a4. r4 b8 | a4 g8 e4 f16[ e] | d4 \bar "|."
}
\addlyrics {
Pe -- gen kaer out, va Breiz, gou -- ri -- zet gant ar môr, War da zae bleuñ me --
len dre bep am -- zer di -- gor, Ha war da ger -- c’henn no -- az dan --
te -- lez me -- ne -- ou, Hag en dro d’es spe -- red eur vou -- genn hun -- vre -- ou __
}
\layout {
indent = #00
line-width = #150
}
\header { tagline = ##f }](http://upload.wikimedia.org/score/0/c/0c0srs8c64icb8mfy8q0healc8ybs4s/0c0srs8c.png)
