Kañnen Nendeleg

Eus Wikimammenn
Sauter à la navigation Sauter à la recherche


KAÑNEN NENDELEG [1]
————

D’en Eutru En Dorb
Person Sant Padern, Guéned.

I

É kreiz en noz didrous en Eled en des kañnet :
« Doéré mat, doéré mat ! Er Salvér e zou gañnet.
« Revou é lein en néan mélasion de Zoué é Dad
« Ha peah ar en doar ol d’en dud a volonté vat !

II

« Ar mézeu Betléem, én un tammig marchausi,
« D’en ér a hantér-noz é ma gañnet er Mèsi ;
« Ridet, o bugulion, er Mab-sen e zou hou Roué,
« Ridet d’en inourein ; er Mab-sen e zou mab Doué. »

III

...Er bed e ié de gol, noz er péhed er golé
A houdé pear mil vlé, mab-dén ér gloéz e houilé,
Glahar lan é galon, lan é gorv a zrougeu garù,
Edan bili en diaul mab-dén e gerhé d’er marù.

IV

Mes ur stirennig dous en des luéhet én néan du,
Ur gañnen estlamus e saù joéius a bep tu...
O doar, taù get er soéh dirak er burhud neùé :
Eit salvein en dud ol, Doué en hum hra dén eùé.

V

Er huirioné bremen é pep lèh e dreménou,
Héaul mat er Garanté ér bed abéh e splannou ;
Er peah e vou roué ér béd ; ne vou mui poén na dareu,
Rak ur hroèdur bihan ’zou gañnet d’emb én ur hreu.

VI

O ia ! huchet, Eled : « De Zoué gloér é lein en né ! »
Galùet de greu Jézuz er vugulion, er rouañné ;
Kañnet ihuél, ihuél, reit er hleued d’er ré boar,
Ma tei de Vetléem en dud a bear horn en doar.

VII

Hum dolpein e hreint ol ardro er Mabig Jézus ;
Er peur e zizolou é drebilleu hirisus,
Er pinùidig eùé e larou é boén kuhet.
Hag er péhour e zei de govesat é béhed.

VIII

Jézus ou cheleuou, hag a greiz é hulé-plouz
Predeg e hrei dehé konzeu fur ha konzeu dous ;
Geton d’é Galon-Doué hur halon peur ’vou staget
Ha pep ankin nezé e neijou kuit èl moged...

IX

O Intron Varia, Guerhiéz hemb kouziadur,
Drest ol er vugalé béniget é hou kroèdur,
Reveoh eùé mélet, o mam, drest en el mammeu,
Rak drézoh é ta Doué de dorrein hul liammeu.

X

Trugèré d’oh, men Doué, de virùikin trugèré.
A hous Ol-Vadeleh ; ni e strèuou en doéré :
Bep plé de Nendeleg get joé, e kañneemb bremen ;
Salvedigeh en doar en des hum hroeit en noz-men !

Miz Kalan-gouian 1908.

  1. Ar don : Al lez-vamm (Mélodies bretonnes par Guillerm et Herrieu, 8 real é burèu Dihunamb, 54, rue de la Comédie, Lorient).