| ◄ Soñnen d’é zeulagad | Er verniken | Péden er moraer ► |
ER VERNIKEN
————
D’en hani 'oér eit più éma.
Guélet em ès un dra hep par :
Ur garreg sonn ar é ziùar,
Ha tro ha tro mor é konar ;
Hag er garreg, — ihuél é ben,
E oé staget doh é grohen,
— Bihan — bihan, — ur verniken.
Digabestret ha didruhé
En tonneu divent e darhé...
Meit er verniken e zalhé.
Ha chetu deit er mor d’arsaù,
Hag er geh berniken tenaù
D’er roh e oé staget ataù.
Er verniken e oui krogein :
Zoh er roh é ma ar é gein
Tra ne hello hé distagein.....
. . . . . . . . . . . . . . . . . . . . . .
Hama, nen dès nitra guiroh :
El er verniken ar er roh,
Me halon zo staget dohoh !