Bet on o vale bro pad eur miz hep ehan.
Gwelet am eus ar môr divent en e gaerder,
Ha dreist an noz du-dall o sevel er pellder
Al lagad burzudus stag ouz an touriou-tan.
Klevet am eus tud vraz ha bugale vihan
O vont en eur gana dindan an heol zeder,
O trouzal noz ha de fentus ha dibreder,
O konta speredek er giz « Parizîan ».
Bremañ, tavet an drouz, hag ar c’hoarz hag ar c’han,
Yénet an heol, pellaet diouzin ar môr ledan,
Ha me distrôet sioul ha didrabas d’ar gêr,
E tañvean, eürus dirak va zôlig voan,
Krog da dol, vel ma teu, va menoz war baper,
Ar blijadur c’houero da ’n em gaout va-unan.
