Breiz a garan gwelet, mamm-goz atao ’n he za,
Pa bar warni sklerder an heoliou diveza,
Pa deu mouez vraz an traou da zioulât dre ar bed,
Ha pa varv en oabl yén c’houéz-vad ar bleuniou bet.
Neuze, koant ha seder eviti da goza,
Hi lez he mantell vriz d’an douar da ruza,
Ha bep kammed ma ra mil delien alaouret
A beg ouz ar vantell vel bagadou stered.
Kement ha ken bihan ma teu, dre forz bale,
He gwiskamant da drei en eur zae aour melen,
Ken e chom sebezet ha mud he bugale :
Deus a welet o mamm ken kaer hag an aele,
E stouont dirazi vel d’ober o fedenn
Hag a greiz o c’halon e strink mouez an delenn.
