Buhez ar Sent/1837/Taræz

Eus Wikimammenn
◄   Mathias Taræz Porfir   ►


An pempet var-nuguent a viz Fevrer.


SANT TARÆZ, ESCOP.


————


Ar Sant-ma a voe ganet e Constantinopl. E vam vertuzus a inspiras dezâ santimanchou bras a Zevotion hac a Religion, pere a voe evel ar fount eus an oll vertuziou caër a voe remerquet ennàn goudese. Queit ha ma tesque dezâ e vam an hent eus ar silvidiguez, e devoa sourci da rei dezan Mistri habil evit e instrui er squianchou divin hac humen ; hac, evel ma en devoa ur speret excellant, e teuas souden da veza unan eus ar re habila en e amser.

O veza bet choaset evit Escop ha Patriarch a Gonstantinopl, ne espernas netra evit e sanctification e unan nac evit hini e oll bobl. Coumanç a eureu, dre lacaat en e dy un urz hac ur reglamant evel en ur gouent. Maga a re bemdez ur certen nombr a beaurien, hac o servicha e-unan.

An devotion vras en devoa evit ar Sacrifiç santel eus an Oferen, ar graçou bras a receve oc’h e lavaret hac ar gonsolationou spirituel a scuille Doue neuse var e ene, a reas dezâ celebri bemdez an oferen, ha bepret gant ur fervor nevez.

Impligea a reas e oll brudanç hae e oll zêl evit conversion an hereliquet ; o instrui a ree e-unan hac e publiq hac e particulier ; lemel a ree o douetou dre e resonnou hac e responchou habil ; scleraat a ree o sperejou dre e sclerigen, ha gounit o c’halonou dre e zouçder carantezus ; hac e ber amser en devoe ar gonsolation d’o guelet oll convertisset.

Petra bennâc ma voa ar Sant-mâ an douça eus an oll dud, ne voa den fermoc’h na startoc’h evintâ, pa voa question eus a c’hloar Doue.

An Ampalaer o fallout dezâ entrepren un dra control da Lesen Doue hac a vize a voal exempl, ar Sant a zisclerias e andurze quent peb seurt poan hac ar maro memes, evit ne andurze un exempl quer fall. Parlant a reas ous an Ampalaer gant ur zêl respetus, mæs ive couraichus. Lavaret a reas dezâ lacât evez na zeuze da elumi ar goler a Zoue varnezàn, en ur derri e Lesen santel, ha penaus erfin e virze ountâ ne antreze en Ilis, mar quendalc’he en e santimant. Al liberte santel-mâ eus ar Patriarch a dennas varnezâ drouc c’hraç an Ampalaer hac hini e gourtissanet, digant pere en devoe cals da anduri.

An Ampalaer o veza deut da vervel, neubeut amser goudese, an Escop santel en em gavas e peoc’h, hac en em roas mui evit biscoas d’an oll exerciçou a zevotion ha d’an oll deveriou eus e garg. Gret en devoa sevet divar e goust ur gouent evit Religiuset : eno e tremene er Retret hac en Oræsoun an oll amser a elle caout dezâ e-unan.

Goude beza gouarnet an Ilis a Gonstantinopl epad daou vloaz var-nuguent, ez eas da receo en Eê ar recoumpanç eus e vertuziou bras, er bloaz 806.

REFLEXION.

Pebes devotion hoc’h eus-hu evit ar Sacrifiç santel eus an Oferen ? Pa en em guivit en æsamant da glevet an Oferen d’an deziou pemdez, ha sourcius hoc’h-hu da assista enni ?

E pe fæçoun e clevit-hu memes da Sul ha da Vouel ? Ha na vec’h-hu quet eno martese evel ma voa ar Vourrevyen var Menez Calvar, evit crucifia a-nevez Jesus-Christ dre hoc’h immodesti ?

Evit clevet ervat an Oferen, considerit penaus ez eo ur memor hac ur represantation eus ar Bassion ha Maro hor salver Jesus-Christ, hac ouspen ur Sacrifiç e pehini en em offr d’e Dad eternel evit silvidiguez ar re veo hac ar re varo. Assistit er Sacrifiç Santel-mâ gant ar memes respet ha gant ar memes carantez, evit Jesus-Christ, evel ho pize bet ma vizac’h bet presant var menez Calvar pa scuillas e goad precius evidoc’h.

E coumançamant an Oferen, offrit da Zoue an Oferen a yet da glevet, evit ar pedir intantion principal a dle pep Cristen devot da gaout ; da guenta, evit adori ar Vajeste souveren a Zoue ; d’an eil, evit e drugarecât eus an oll graçou hoc’h eus recevet digantâ ; d’an drede, evit goulen diguentâ ar pardoun eus ho pec’hejou ; d’ar bevare, evit goulen an oll graçou a bere hoc’h eus ezom evit an amser da zonet.

N’en em gountantit quet da lavaret hebquen ho Chapelet pe Pedennou-all vocal, grit ouspen-ze reflexion var Passion hor Salver.

Grit da Goumunion ar Bælec ho Coumunion spirituel, da neubeuta, oc’h excita en ho calon ur garantez ardant evit Jesus-Christ, hac un desir bras d’en em unissa gantàn.

Hac, evel ma en em offr Jesus-Christ evidoc’h, na vanquit quet da ober ive dezâ an offranç ac’hanoc’h hoc’h-unan, eus ho speret hac eus ho calon.