- Betleem, ar gêr vihana,
’Zo deut da veza ar vrasa,
Peogwir enni eo bet ganet
Ar Mesiaz, Salver ar bed.
- E bolz an nenv, eur steredenn,
Trec’h kalz d’an heol he sklerijenn,
A zisklerias d’an tri Roue
E oa ganet gwir Vab Doue.
- Raktal int da guitaat o bro,
Ha da ober hent war-eun-dro ;
O steredenn kaer a luc’he
D’o blenia betek ar Jude.
- Ar Mesiaz p’o deus kavet,
Dirazan o zri zo stouet ;
N’oant bet biskoaz ken eürus
’vel e kraou ar Mabig Jezus.
- ’vit diskouez o anaoudegez,
P’o deus kalz a binvidigez,
E roont aour, ezans ha mir.
Pebez karantez ! N’eo ket gwir ?
- An aour a ziskouez eo Roue,
Hag an ezans ez eo Doue ;
Dre ar mir e anavezomp
Eo, ivez, eun den eveldomp.
- Deomp, evel an tri Roue,
Da welout Jezuz, Mab Doue,
Ha pe ’z omp pinvidik pe baour,
Profomp d’ezan mir, ezans, aour.
- Roomp d’ezan gant largentez
Aour hon c’halon, hon c’harantez,
Ezans ar gwir bedenn gristen,
Ha goude, mir ar binijenn.
- Meuleudi d’eoc’h Salver ar bed,
Ho kloar, hirie, dre-holl a sked ;
Meuleudi da Zoue an Tad,
D’ar Spered-Santel, evit mat.
|
