Barzhaz Breizh/1846/Itroun Varia Folgoat
Oberennoù damheñvel pe handelvoù all zo ivez, gwelout Itron Varia ar Folgoad.
— Iec’hed ha joa gan-e-hoc’h va zad !
— Petra rit aze mintin mad ?
Gwalc’hi doalou ker gwenn hag erc’h !
Petra rit-c’houi aze, va merc’h ?
— Me zo deut d’ho pedi, va zad,
Da vont evid-oun d’ar Folgoat ;
Ha mont diarc’hen ha war droad
Ha war ho taoulin, mar gell pad.
Eno e kefot ludu gret
Diouc’h ar galoun ec’h euz maget.
— Petra, va merc’h paour, ec’h euz gret,
Pa viot evel-ze luduet ?
— Eur bugelik zo bet lazet,
Ha d’in, va zad, eo tamallet. —
Eunn deiz ann aotrou Pouligwenn
Oa eet da sersal ’raog he lein.
— Setu ama eur c’had kignet,
Pe eur bugelik gwalennet ;
Krouget eo diouc’h brank ar wezen,
E kerc’hen he c’houg ar zeizen. —
Hag hen da gaout he itroun,
O sonjal druz enn he galoun.
— Sellit ! eur bugel paour lazet ;
Piou, han Doue, neuz hen ganet ? —
Ann itroun, heb lavarout ger,
Az eaz d’ar vereuri e-berr :
— Mad ar bed gan-e-hoc’h, mereurez ?
Dont ra ho kanab brao e-mez.
— Va c’hanab brao mez na zeu ket :
Mont a ra holl gand ho koulmed.
— Peleac’h int eet ho merc’hed-c’houi,
Pa na welann nemet hoc’h-c’houi ?
— Diou zo er ster gand ann dillad,
Ha diou-all zo o paluc’hat ;
Ha diou-all zo o paluc’hat ;
Hag ann diou-all zo o kribat.
Mari Fanchonik, va nizez,
Hounez zo er gwele diaez ;
Er gwele klanv ez eo chomet,
Eiz pe nao deiz zo tremenet.
— Digorit d’in, va mereurez,
Hag e welin va fillorez.
— Va fillorez, din livirit,
Peleac’h ’ma ’nn droug a zamantit ?
— Kreiz-tre va c’hof ha va c’haloun,
Ema va droug, va mamm baeroun.
— Savit, savit, va fillorez,
Hag it d’ann tad Fransez da goez ;
Kovesait mad ho pec’hed ;
Hag evesait, mar keret.
— Evit pec’heurez, n’em ounn ket ;
Eiz-teiz zo ounn bet koveset.
— Gevier d’in na livirit ket,
Eur pec’hed braz hoc’h euz c’houi gret ;
C’houi zo bet mintin-ma d’ar c’hoat ;
Ruz eo ho poutou gand ar goad ! —
— Pachik bihan, lavar d’in-me,
Petra ia gand ar pae-ze ?
— Ho mereurien a Wigourvez,
Ar c’hrouger hag ho fillorez. —
Kriz vije neb ha na welje,
War dachen Folgoat, pa zeue ;
Pa zeue ar plac’h pemzek vloa,
E-kreiz daou arser da grouga ;
Eur c’hrac’hik koz paour dirag-hi,
O terc’hel eur goulou d’ezhi ;
Hag hi, o vont, a lavare :
— Ne oa ked d’in ar bugel-ze. —
Ann itroun war lerc’h o c’houlen
Truez d’he fillorez a-grenn :
— Laoskit gan-in va fillorez :
Roi a rinn d’e-hoc’h, arc’hant he fouez
Ha mar na blij d’hoc’h kement-ze,
Me roi d’e-hoc’h pouez va inkane,
Me roi d’e-hoc’h pouez va inkane,
Ar plac’h ha me war he gorre. —
— Ho fillorez n’ho pezo ket,
Neb a lazaz a vez lazet.
Paz ee ’r senesal da vernia,
A ieaz ar c’hrouger d’he c’hrouga.
A-benn eunn pennadig goude,
Dont a reaz d’he gaout-he :
— Aotrou senesal, me ho ped,
Mari Fanchonik na varv ket ;
Pa daolann va zroad war he skoa,
Distrei da c’hoarzin ouz-in ra.
— Taolit hi ha didaolit hi,
Kasit-hi d’ar fagodiri.
— Taolomp-hi ha didaolomp-hi,
Greomp tan ha moged d’he leski. —
Abenn eunn pennadig goude,
Dont a rea ’r c’hrouger adarre :
— Aotrou senezal, me ho ped,
Mari-Fanchonik na varv ket ;
Ma enn tan beteg he diou-vron ;
C’hoarzin a ra leiz he c’halon.
— Pa gredinn pez a leveret,
Ar c’habon-man devo kanet. —
(Eur c’habon rostet war eur plad,
Han debred nemet he zaoudroad.)
Ar senesal oa souezet :
Ar c’habon en devoa kanet.
— Mari Fanchonik, me ho ped,
Me zo faillet, c’houi n’em hoc’h ket ;
Me zo faillet, c’houi n’em hoc’h ket :
Petra zo enn tan d’ho miret ?
— Ann itroun Varia-Folgoat
Zo’ skuba dindan va daou-droad ;
Ar Werc’hez, mamm ar gristenien,
Zo’ skuba endro d’am c’herc’hen.
— Red eo kas prim da Wigourvez,
Kas prim da di ar vereurez ;
Red kas da di ar vereurez,
Da gouzout piou eo pec’heurez. —
Tremenet oant holl dre ann tan,
Ha nikun na lekeaz man ;
Tremenet holl heb lakat man :
Ar vatez a joumaz enn han.