Aveliou Breiz

Eus Wikimammenn
Sauter à la navigation Sauter à la recherche
Armorica, 1935  (p. 144-145)



AVELIOU BREIZ
(War an hevelep ton gant « Son ar Jistr »)
————


Pez a lak va c’halon da ranna
Aboe ’m eus dilezet va bro,
Eo dre ne glevan mui o kana
Aveliou Breiz er gwe dero ;
Amañ son hepken
Eun avel ankén,
Vel o ouéla traou kollet da virviken,
Eun avel kriz ha garo
Evel klemm ar Maro.

Er gêrig koant elec’h ’mon ganet
Vijê klevet eur ganaouenn
A-greiz ar bleuñ neve diwanet
O sevel seder ha laouen ;
Dindan heol an hañv
O sklerijennañ,
Eun avelig flour a zigasê gantañ
Mouez galloudus ar maeziou
Ha c’houéz-vad ar bleuniou.

Pa zic’houinet ar mén-higolenn
War dro Gouel-Yann er prajeier,
Aezennou kanus vel eun delenn
A nijê noz-de dre an êr ;

Ha pa dremenê
C’houéz ar foenn neve,
Pep kalon er vro gant dudi a vervê,
Dre holl ne vijê klevet
’Med soniou eürusted.

Pa grogê ar mesaer da gana
D’an abardae war ar mene,
Ha deût an devez da distana,
An avel noz a zihunê,
Hag a yê en dro
Skanvik dre ar vro
’N eur gonta kôjou d’an deligou dero
’N eun digeri d’an ene
Dorojou an hunvre.

Pa deuê krozmol ar gorventenn
E-kreiz an noz du da zevel,
Mouez va zud varo a intenten
En avel yud oc’h va gervel,
Hag o lavaret :
« Dalc’h feal bepred
« D’ar yez ha d’ar giziou hon deus-ni karet,
« Chom atao en Breiz-Izel
« Da veva, da vervel ! »

Ouz va zud koz n’am eus ket zentet,
Graet am eus fae war o lavar,
Ha setu me, dervenn displantet,
Kollet ganin va gwir douar !
Pegoulz e klevin
O son en dro d’in
Aveliou gwechall ken fresk ha ken lirzin,
Peur e savo adarre
Heol Breiz war va gourre ?


————