Ar Groaz en Breiz

Eus Wikimammenn
Sauter à la navigation Sauter à la recherche
Moulerez Sant-Gwilherm, 1909  (p. 6-7)



AR GROAZ EN BREIZ !
————


Ton : Kastibelza


Perak, eta, a zo kement a groajo
En Breiz-Izel ?
Er c’hroaz-hencho koulz evel er berrejo,
War an uhel,
En traouienno, e-kreiz ar c’hoajo kuzet,
Dre-oll ’kaver
War douar Breiz, evel an derw gwriennet,
Kroaz hon Zalver ! (Diouvech)

Ar fe gristen, e pad kalz a gantvejo,
He deus savet
En Breiz-Izel, dre-oll, kement a groajo
Ewit laret :
Ar Vretoned, gant kalvario, ’deus skrivet,
Dre o bro gaer,
Pegement ’deus, hag a rum-da-rum, karet
Kroaz hon Zalver !

Ar garante hag an anaoudegez-vat
O deus laket,
En amzer-goz, na ouve den ped Breizad,
Breman ankouêt,
Da gempenni, tost d’o zi pe d’eur chapel
Tost deur maner,
An dra gaeran ’hallent kât dirak o zel :
Kroaz hon Zalver !


A-wecho-all, ’krec’h eur c’hra, war an dosen.
’Tal eur groaz-vin,
E ve gwelet perc’herined a vanden,
War o daoulin ;
En dro d’ar groaz, Kroaz ar Zalud, pa welont
An iliz kaer
’Lec’h ’ve ’r pardon ; mont-dont, holl e saludont
Kroaz hon Zalver !

Nag a groaz c’hoaz a weler war ar c’hleunio,
En du liwet !
’Wit digas sonj peurvuan eus gwaleurio
Bet c’hoarveet !
Er lec’hio-ze e ve marvet kristenien
E lakeer,
E koun anê, ’wit kât d’o ine peden,
Kroaz hon Zalver !

Stank a dra-zur, ha start da-vat, war eun dro
Ar groaz en Breiz !
Hen diframan a glasker, e barz hon bro,
Dimeus hon c’hreiz !
Na lezomp ketober ze ! Ze ’ve pec’hed !
Bretoned ker,
’Vel hon zud koz, dreist pep tra, karomp bepret
Kroaz hon Zalver !

Karomp ar groaz, ha c’houi, Bretoned kristen,
Pôtred, merc’hed,
Douget anei war ho kalon, ’n ho kerc’hen,
Hep mez ebet !
Karout ar groaz ! Ze a dalveo d’ec’h kât
Maro evruz !
O kaerat tra ! gallout mervel ’n eur bokat
Da groaz Jezuz !