Tolen eured

Eus Wikimammenn
Sauter à la navigation Sauter à la recherche
Arvorig, 1914  (p. 144-145)



TOLEN EURED


————


WAR DON : Tuchant e arruo an hanv.
Les partitions musicales sont temporairement désactivées.


1

Petra zo ’neve er c’harter,
Pa vrall ken laouen ar c’hleier ?
N’oc’h ket, marvad, eus ar c’hontre,
Pa ne oaret ket an doare ? (bis)

2

Ne glevet ket mouez ar biniou
O tisrevel ar goulennou ?
E vouez en avel o nijal
A lak yaouankiz da dridal.

3

Pignomp aman war ar garrek ;
Klevet a ran trouz ar c’hezek :
Sell int du-hont o tiflukan ;
Yannig ar Mestr ’zo da gentan !


4.

Eun dek pe daouzek ahendall,
War ar rubaniou o poanial ;
Hag erfin mab ar c’hemener
Bet eilpennet war al leur-gêr…

5.

Setu breman ar c’harr eured
Livet en fresk ha rubaniet ;
An dud enor, ar zonerien,
Ha gante ar c’houlennerien

6.

Ar meliner koz en eun tu,
Gant baz valan ha lêrou ru,
Hag ar meliner[sic] en tu all
Prest da ganan ha da zansal.

7.

O c’harg, betek varc’hoaz vintin,
Eo lakat an dud da c’hoarzin,
Ober jolori hag ardou,
Pa vo « dro-zans an askorniou. »

8.

Nag a c’hrizilhen o tintal
Ha nag a girri o ruilhal !
An nec’hamant hag ar vizer
A zo ankoueet ’barz ar gêr.

9.

O pegen loc’hus ar Breizad
Gant e « charban » hag eur jo mad
War henchou e vro o vale,
Dishual evel eur roue !

10.

Bombard, biniou, c’hoarz ha dudi
Ha gwiskamanchou o skedi :
Ma c’halon a drid ’barz ma c’hreiz
Dirak tolen eured a Vreiz !

Koulmig Arvor