Dal m’en em lake ar Varzed koz da gana, e veze o c’hanaouennou ken dudius ma tirede, raktal, an Aelez, d’o selaou, war dreujou ar baradoz.
Kement-se a zo bet skrivet diwar-benn Barzed ar Vvet kantved ; kement-se a c’hellfed da lavarout, kenkouls all, diwar-benn Barzed an XXvet kantved ; da zevel kanaouennou a vez eun drugar o c’hlevout, Breiziz n’o deus ket o far. Evit gwelout ha ne veulan ket re en holl va c’henvroïz, digorit Kanaouennou ar Bleun-Brug ha levriou Soniou Feiz ha Breiz ; war veur a dra e vezomp trec’het, met lakit komzou ha toniou ar soniou-ze kenver ha kenver gant komzou ha toniou soniou broiou all ar bed hag e rankoc’h anzav ganen ne gaver ket a zoniou kaeroc’h eget re Vreiz e nep lec’h.
O lakomp eta etre daouarn hor yaouankiz ha deskomp d’ar re-man o c’hana, evel m’eo dleet ; laouenoc’h e vezo Breiz hag al laouenedigez, her gouzout a rit, eo merc’h ar baradoz evel ma ’z eo ar boan merc’h an douar.
Ma na lakomp ket a zoniou mat etre daouarn hon tud yaouank e kanint soniou lous ha flaerius a ginniger a vil-vern d’ezo e yez Bro-C’hall, rak ar yaonankizou a rank kana da greski o levenez ha da ankounac’haat o zristidigez.
Parreziou a zo ha ne glever kanaouenn ebet enno ken ha nemet gwasoc’h a-ze ez eo o stad, rak parreziou int hag ema enno ar vuhez kristen hag ar vuhez vreizek o vervel.
Kanomp eta ha lakomp kana, en dro deomp, ma vezo koantoc’h ar maeziou, skañvoc’h al labouriou, sederoc’h ar c’halonou ha laouenoc’h an eneou.
Y. V. PERROT,
Rener Feiz ha Breiz,
Pennad eus ar brezegenn a reas warlene e Bleun-Brug Douarnenez, d’an 3 a viz Gwengolo 1929.
