— 36 —
PEURZORN
————
Kent [1] terri al linen eus an diou gostezen
O deus, a-hed an deiz, dalc’het d’en em zouten
Ar freilhou war al leur, gant an taol diweza,
A lakay an douar, ar c’hranjou da grena.
En desped d’ar skuizder, da verka ar peurzorn,
’Vo graet eur youc’hadeg. Goude, e-barz eur c’horn,
E sec’hor ar c’houezen ’pad ma tired founnus
An Itron eus an ti, en he dorn jistr bervus,
’Vit treuzi al leuriad da leunia ar weren
A ro kalon d’an den, ’neta ar c’hourlanchen.
Ar merc’hed a dosta gant o ferc’hier en aer
Da gempen ar c’holo ’vel en-dro d’an aoter,
E Rom, ar Vestaled, p’en dije ar roue
Renet al lidou sakr en enor da Zoue.
Neuze, holl a vesko c’hoarz ha kanaouennou
Ken na baro en oabl skleur ar steredennou.
|
∞
- ↑ A-raok
