Pajenn:Perrot - Bue ar Zent.djvu/518

Eus Wikimammenn
Sauter à la navigation Sauter à la recherche
Adlennet eo bet ar bajenn-mañ
518
20 Gouere
santez mac'harit

Hadan reas sklerijen ar fe en he spered ha lakat a reas karante Doue da ziwan en he c’halon.

Mac’harit a selaoue hag a gomprene he magerez, ha pa deuas skiant d’ezi, e c’houlennas bezan badezet.

En he fedennou, e lavare da Zoue e chomje bepred gwerc’hez hag e vije laouen o rei he bue evel testeni eus he c’harante evitan.

He zad ne zaleas ket da c’houzout e oa badezet e verc’h ; ober a reas d’ezi dont d’ar gêr raktal, hag e lavaras d’ezi, droug ennan :

— Red eo d’it lezel a-goste ar Jezuz-ze a bedez, trei kein dioustu d’e greden ha kinnig ezans d’an doueou : ahendall ne vezin mui da dad, mes da vourreo !

— N’eus forz petra refet d’in, eme Vac’harit kerkent, ho merc’h e vezin bepred, ha bepred ho karin hag ho toujin evel ma zad ; mes daoust d’ar poaniou skrijusan, ne zilezin biken lezen Jezuz ha ne adorin nemet ar gwir Doue, en deus grêt a netra an nenv hag an douar.

Eur respont ken kaer, elec’h digeri daoulagad he zad, ne reas nemet e gounnari muioc’h-mui. Rei a reas urz d’he stlepel e-touez ar sklavourezed, d’he magan evelte, ha d’he lakat d’ober al labouriou diêsan, hep true ebet ouz he yaouankiz.

Mac’harit a veze bepred laouen ouz ar re a oa war he zro, ha henvel oa ouz eun êl diskennet eus an nenv.

He labour a veze bepred grêt mat.

Koulskoude, an tad digalon ne gave ket e oa awalc’h c’hoaz ; lemel a reas digant e verc’h he dilhajou kaeran ha, gwisket evel eur baourez, e kase anezi da ziwall al loened, n’eus forz peseurt amzer a rê.

Eun devez e oa gant e chatal en kichen an hent bras, pa dremenas dre eno ar gouarner Olibrius. O welet he gened dispar hag he dremm kaer evel eur rozen, n’hallas ket miret da c’houlenn outi he hano :

— Merc’h on da Edisius, eme Vac’harit ; en Antioch on ganet, ha badezet on.

Ar gouarner a c’hourc’hemennas he digas d’e lez.

An de war-lerc’h e klaskas he zouellan :

— Kaer ho pezo, emezan d’ezi, lavaret ez oc’h badezet, ar zonj-ze a yelo hepdale eus ho spered, rak me fell d’in ho timezi, ha rei d’ec’h eleiz a enoriou hag a vadou.

Otrou, a respontas Mac’harit, komz a ret eus dimeziou, mes ma eured me a zo grêt pell a zo ; abaoue ma badeziant ne glaskan nemet eun dra : plijout da Zoue.