Pajenn:Perrot - Bue ar Zent.djvu/43

Eus Wikimammenn
Sauter à la navigation Sauter à la recherche
Adlennet eo bet ar bajenn-mañ
12 Genver
43
sant beneat

a hanvas Beneat da abad en manati Sant-Per ha Sant-Pol. Mes Beneat, pa gavas an tu, da lavaret eo, daou vla goude, a lakas Adrian en e blas hag a gemeras hent Rom evit ar bedervet tro.

Betek neuze, en Breiz-Veur, an tier hag an ilizou, zoken, a oa en koat, toet en zoul, ha paour an treo war o zro. Beneat, o tizrei eus Rom, a zigasas gantan masonerien, gweraerien ha liverien, da zevel daou vanati neve en Bro-Zôz : unan, en enor da zant Per, hag eun all, en enor da zant Pol.

Pa oe demc’hrêt al labouriou brasan endro d’an daou vanati-ze, e reas tro Rom evit ar bempvet gwech hag e tigasas gantan levriou, tôlennou, relegou roët d’ezan gant ar pab Agathon. Dont a reas gantan ive eun abad hag a oa mestr-kaner en iliz Sant-Per, evit deski d’ar venec’h sôz ober al lidou sakr ha kanan ar c’han iliz evel en Rom.

Ar gozni a reudas e holl izili. Dre n’halle ket diskenn d’an iliz evel ar re-all, eun nebeut menec’h a chome gantan, ha rannet en daou geur, e kanent an ofis en e gichen ; ar zant a ’n em unane gante a galon, pa n’halle ket hen ober a c’henou.

Arôk mervel, e pedas start e ziskibien da viret mat ar reolen an evoa savet evite, hag e oa gourc’hemennet enni, emezan, ar pep gwellan an evoa gwelet ober er seitek manati an evoa kavet er rouanteleziou ’lec’h ma oa tremenet. Mervel a reas etre divrec’h e venec’h, an 12 a viz genver 690.

————


KENTEL


Ar bale-bro


Sant Beneat a gare bale dre ar bed : eur Zôz a oa, hag ar Zôzon, a-viskoaz, o deus bet hag o deus miret ar pleg-se, an eus grêt gante, marvad, ar bobl barrekan d’en em denn war an douar.

Darn a zo hag a gav fall kement a zo en o bro ha mat kement a zo er broiou-all ; hennez eo pleg ar vugale. Darn-all a gav mat kement a zo en o bro ha fall kement a zo er broiou-all : hennez eo pleg ar re goz. Daou bleg fall int o-daou, hag a lemer eus ar spered o vont etouez an dud. Ar bale-bro a zigor ar spered hag a sedera ar galon.

Gwasan zo, eleiz, pan eont eus ar gêr, a goll giziou mat o bro, hag a gemer giziou fall ar broiou ma tremenont enne ; war digare mac’h eont en kêr, e kavont mat lezel Doue er gêr. N’eo ket evelse eo dleet ober ; n’eo ket evelse e rê sant Beneat. Ne zelle nemet ouz ar pep gwellan a gave war e hent, hag ar pez an ije goneet a lake, goude, da binvidikât e genvroïz en pep doare.

Baleou evelse, n’e ket eur c’holl amzer hag eur c’holl arc’hant int ; baleou evelse a zo talvoudus evit ar spered, ar galon hag an ene.