Pajenn:Morvan - Buez ar Zent, 1894.djvu/417

Eus Wikimammenn
Adlennet eo bet ar bajenn-mañ
13 a Even
409
sant anton a badou

euz ar gouent, evel : da skuba ann ti, da zikour skaota er gegin. Mes ann dra-ze oa he blijadur; rak ne glaske nemed beza kemeret evit eunn den ha n’oa mad da netra.

Evelato Doue ne zaleaz ket da rei da anaout ann tenzor a skiant hag a furnez a ioa kuzet enn he ene. Eunn devez, he zuperior a ordrenaz d’ezhan lavaret eur gomz bennag dirak eunn asamble a venac’h euz a Urs sant Dominik hag euz a Urs sant Fransez. Anton a zentaz, hag a reaz eur zarmoun ker kaer ma chomaz ann holl mantret. « Biskoaz, emezho, n’o doa klevet bravoc’h sarmoun. »

Neuze sant Fransez a gargaz ar Zant da ober skol d’ar re all var ann theoloji. Anton eta a rejantaz e meur a gear enn ltali hag e Frans. Mes goudeze ec’h en em daolaz holl da rei misionou d’ar bobl. Hogen, e kement leac’h ma prezege, ann dud a zirede d’he zelaou a vandennadou ; rak ar brud en doa da veza eur prezeger dispar, hag, evit guir, den ne c’houie guelloc’h evithan ann tu da skleraat ar sperejou ha da c’hounit ar c’halounou.

Poania a eure dreist peb tra da ziarbenn ar fals kredennou. Skei a rea varnho starta ma c’helle, hag abalamour da ze e oue leshanvet Morzol pe Maill ann heretiked. Mes ne boanie ket nebeutoc’h da ziarbenn ann dizursiou ha da derri ar giziou fall a ioa en em zilet etouez ar gristenien fidel. Dalc’h-mad ive e rea brezel d’ann dizursiou ha d’ar giziou fall-ma, heb kaout damant da zen nag aoun rak netra.

He viraklou a greske c’hoaz ann nerz a roe Doue d’he gomzou. Eunn droiad m’edo o sarmoun e Rimini dirag eur vandenn vraz a heretiked, e remerkaz e lakea ar re-ma ho bizied enn ho diouskouarn evit miret na glevchent ar pez a lavare. Kerkent e tiskenn euz ar gador, hag ez a var bord ar mor da c’helver ar pesked da zont d’he zelaou. Ar pesked a zent outhan, hag a deu, a ganchou hag a vilierou, d’en em renka dirazhan var c’horre ann dour, ar re vihana er penn araok. Eunn dra ker burzuduz a zigoraz ho daoulagad d’ann heretiked, hag a reaz d’ann darn vuia anezho anaout ar virionez euz ar relijion gatholik.