Pajenn:Morvan - Buez ar Zent, 1894.djvu/244

Eus Wikimammenn
Sauter à la navigation Sauter à la recherche
Adlennet eo bet ar bajenn-mañ
236
3 a Ebrel
sant beneat, ar morian



KENTELIOU SANT FRANSEZ A BAOL

Da genta. — Ann den ne vezo biken euruz hag e peoc’h ma ne d-eo vertuzuz ha devot.

D’ann eil. — Ann hini n’e ket humbl ne d’eo e guirionez na devot na vertuzuz.

D’ann trede. — O peger braz eo Doue, ha pegen dister ann den ! Pa’z eo eunn Doue en em izeleat kement, hag en em lakeat henveloc’h netra, penaoz e c’hell ann den klask en em zevel ?

D’ar pevare.— Ann humilite hag ar garantez eo ann daou vean-diazez euz ar zantelez kristen.






ann trede devez a viz ebrel


SANT BENEAT, AR MORIAN
————



Beneat a ioa euz ar vouenn dud-se a reer Morianed anezho abalamour m’eo du ho c’hroc’henn, hag a zo stag outho c’hoaz ar valloz a laoskaz guech all Noe var he vab bihan Kanaan. He dad a ioa esklav pe esklavour e ti eun Aotrou braz euz ar Sisiil, hag he vamm a ioa bet esklavourez ive, mes ne oa mui. Hogen, mestr he dad en doa lavaret d’ezhan ne gemerje ket da esklav ar c’hrouadur kenta en devije, ha Beneat a oue ar c’hrouadur-ze ; Beneat eta ne oue ket esklav evel he dad.

Petra bennag ma’z oa morian ha ma veve enn esklavach, tad Beneat a ioa eunn den a relijion, ha ne espernaz netra evit ober ive eur c’hristen mad euz he vab. Ne zeskaz ket d’ezhan lenn ha skriva, rak ne c’houie ket he-unan ; mes deski a reaz d’ezhan skiant ar Zent : ar pez a zo kalz guelloc’h. Deski a reaz d’ezhan karet Doue euz a greiz he galoun, ha beza ato var evez evit en em ziouall diouz ar pec’hed.

Ar c’henteliou-ze a ieaz doun e spered Beneat, hag ar paotrik keaz ne ehane da bedi epad ma veze o tiouall al loaned ; rak ann dra-ma oa he vicher enn he vugaleach. Pa deue ar botred all da velet petra rea, ne vankent morse da gaout anezhan var bennou he zaoulin, ha setu perak o doa he leshanvet ar Zantik du.