28. Ha Sadok, paotr eûz a eur vuézégez vâd, ha tî hé dâd, daou brin̄s war-n-ugen̄t.
29. Hag eûz a vipien Ben̄jamin, breûdeûr Saül, tri mil ; râg eul lôd brâz anézhô a heûlié c’hoaz tî Saül.
30. Hag eûz a vipien Éfraim, ugen̄t mil hag eiz kan̄t ; tûd kré-brâz ha brudet enn hô c’héren̄tiézou.
31. Hag eûz a han̄ter-vreûriez Manasé, triouec’h mil, péré a zeûaz pép-hini enn hé hanô évid lakaad David da roué.
32. Hag eûz a vipien Isakar, tûd desket-mâd, péré a anavézé ann holl amzeriou, évit gourc’hémenni da Israel ar péz a dlié da ôber, daou c’han̄t prin̄s ; hag ar ré all eûz ar vreûriez a heûlié hô ali.
33. Hag eûz a Zabulon, péré a oa tûd-a-vrézel, a oa bépréd hô armou gan̄t-hô, ha daré d’ann emgann, é teûaz han̄ter-kan̄t mil da gen-ners d’ézhan̄, hag hî a galoun vâd.
34. Hag eûz a Neftali, mil prin̄s ; ha gan̄t-hô seiz mil ha trégon̄t a wié stourmi gan̄d ann diren ha gan̄d ar gwâf.
35. Hag eûz a Zan, eiz mil war-n-ugen̄t ha c’houec’h kan̄t, daré d’ann emgann.
36. Hag eûz a Aser, daou-ugen̄t mil, a gerzé d’ar stourm, hag a oa daré d’ann emgann.
37. Hag eûz a enn tû all eûz ar Jourdan, eûz a vipien Ruben, eûz a C’had, hag eûz a han̄ter-vreûriez Manasé, c’houec’h-ugen̄t mil gan̄d armou brézel.
38. Ann holl vrézélidi-zé daré d’ann emgann, a zeûaz da Hébron a galoun vâd, évit lakaad David da roué war Israel holl ; hag ar ré all holl eûz a Israel na c’houlennen̄t két gwell égét ma vijé lékéat David da roué.
39. Hag hî a choumaz énô tri dervez é-kén̄ver David, ô tibri hag oc’h éva ; râg hô breûdeûr hô dôa aozet pép-trâ d’ézhô.
40. Hag ivé ar ré a oa war hô zrô, bétég Isakar ha Zabulon, ha Neftali, a zigasé bara war azéned, ha war gan̄valed, ha war vuled, ha war éjenned, évid hô maga ; ha bleûd, ha fiez, ha rezin séac’h, ha gwîn, hag éôl, hag éjenned ha den̄ved, ha pép-trâ gan̄t founder ; râk lévénez a ioa é Juda.
1. Hôgen David a strollaz é kuzul ar villénerien, hag ar c’han̄ténerien, hag ann holl brin̄sed,
2. Hag a lavaraz da holl strollad Israel : Mar d-eo dâ gan-é-hoc’h, ha ma teû digan̄d ann Aotrou, hon Doué, ar péz az ann da lavaroud d’é-hoc’h, kasomp étrézég hor breûdeûr all é holl vrô Israel, hag étrézég ar véleien, hag al Lévited, péré a choum é faboursiou ar c’heriou, évit ma en em strollin̄t gan-é-omp ;
3. Ha ma tigasimp adarré arc’h hon Doué étrézég enn-omp : râk n’hon eûz két hé c’hlasket é deisiou Saül.
4. Hag ann holl strollad a lavaraz é vijé gréat evel-se ; râg al lavar-zé a oa bét kavet mâd gan̄d ann holl bobl.
5. David éta a strollaz Israel holl, adalek Sibor ann Éjipt, bétég hen̄t Émat, évid digas arc’h Doué eûz a Gariatiarim.
6. Ha David a biñaz, hag Israel holl gan̄t-han̄, da gréac’h Kariatiarim, a zô é Juda, évid digas ac’hanô arc’h ann Aotrou Doué a zô azézet war ar gérubined, hag é péléac’h eo galvet hô hanô.
7. Hag hî a zigasaz arc’h Doué war eur c’harr névez eûz a di Abimadab ; hôgen Oza hag hé vreûr a vlén̄é ar charr.
8. Ha David, hag Israel holl a c’hoarié dirâk Doué eûz hô holl ners, gan̄d hô c’hanaouennou, ha gan̄t télennou, ha gan̄t lirennou, ha gan̄t taboulinou, ha gan̄t simbalou, ha gan̄t korniou.
9. Hôgen pa oen̄t deûet war-harz leûr Chidon, Oza a astennaz hé zourn évid harpa ann arc’h : râg eunn éjenn ô véza gwin̄ket eunn nébeût en dôa hé lékéat da gostéri.
