ann Aotrou, ha ma servichimp douéed a-ziavéaz.
17. Ann Aotrou hon Doué eo en deûz hé-unan hon tennet, nî hag hon tadou, eûz a zouar ann Éjipt, eûz a vrô ar sklavérez : ha gréat en deûz dirâg hon daoulagad arwesiou brâz-meûrbéd, hag en deûz hor miret enn holl hen̄t dré béhini hon eûz kerzet, hag é-touez ann holl boblou dré greiz péré hon eûz tréménet.
18. Hag harluet en deûz ann holl vrôadou-zé hag ann Amorréed a choumé enn douar é péhini omp deûet. Servicha a raimb éta ann Aotrou, ô vésa ma eo hén̄ hé-unan hon Doué.
19. Ha Jozué a lavaras d’ar bobl : Na hellot két servicha ann Aotrou, râg eunn Doué san̄t eo, eunn Doué kré hag oasuz, ha né két héb anaout hô torféjou hag hô péc’héjou.
20. Mar tilézit ann Aotrou, ha mar servichit douéed a-ziavéas, é trôiô enn hoc’h énep hag é c’hlac’harô ac’hanoc’h, hag é vevésô ac’hanoc’h goudé béza gréat vâd d’é-hoc’h.
21. Hag ar bobl a lavaras da Jozué : Na c’hoarvézô bikenn ar péz a lévérez ; hôgen servicha a raimb ann Aotrou.
22. Ha Josué a lavaras d’ar bobl : Testou oc’h pénaos hoc’h eûz dilennet hoc’h-unan ann Aotrou évid hé servicha. Hag hî a respoun̄tas : Testou omp.
23. Bréma éta, émé-z-han̄, lamit ann douéed a-ziavéaz eûz hô touez, ha soublit hô kalounou étrézég ann Aotrou, Doué Israel.
24. Hag ar bobl a lavaras da Jozué : Servicha a raimb ann Aotrou hon Doué, hag é sen̄timp oud hé gélennou.
25. Josué a réas éta enn deiz-zé kévrédigez gan̄d ar bobl, hag é lékéaz dira-z-han̄ ar c’hélennou hag ar barnédigézou é Sichem.
26. Skriva a réaz ivé ann holl c’heriou-zé é levr lésen ann Aotrou ; hag é kéméraz eur méan brâs-meûrbéd, a lékéaz dindân eur wésen dérô a ioa é san̄tuar ann Aotrou :
27. Hag é lavaraz d’ann holl bobl : Chétu ar méan-zé a vézô da dést d’é-hoc’h, pénaos en deûz klévet ann holl gomsiou en deûz lavaret ann Aotrou d’é-hoc’h ; gan̄d aoun na felfé d’é-hoc’h goudé-henn hô dinac’ha, ha lavarout gévier d’ann Aotrou hô Toué.
28. Hag é kasaz kuit ar bobl, pép-hini d’hé drâ.
29. Ha goudé-zé Jozué, mâb Nun, servicher ann Aotrou, a varvaz, hag hén̄ oajet a zék vloaz ha kan̄t.
30. Hag hî a véziaz anézhan̄ é harzou hé drâ hé-unan, é Tamnatsaré, a zô diazézet war vénez Éfraim, war-zû ann han̄ter-nôz eûz a vénez Gaas.
31. Hag Israel a servichaz ann Aotrou é-pâd ann holl zeisiou eûz a Jozué hag eûz ann hénaoured a vévaz pell-amzer goudé Josué, ha péré a anavézé ann holl ôberiou en dôa gréat ann Aotrou enn Israel.
32. Bésia a réjon̄t ivé eskern Jozef, hô dôa digaset bugalé Israel eûz ann Éjipt, é Sichem, enn eul léac’h eûz ar park en dôa prénet Jakob digan̄t vugalé Hémor, tâd Sichem, hag a oa digwézet é kers da vugalé Josef.
33. Éléazar, mâb Aaron, a varvaz ivé ; hag é vézchon̄t anézhan̄ é Gabaot, a oa da Finéez, hé vâb, hag a oa bét rôet d’ézhan̄ war vénez Éfraim.
