Krog aketus en e vicher
Piker,
Krog aketus en e vicher,
E kas en dro an noadeier
Ken ma red an dour gant e lêr,
E kas en dro an noadeier :
N’eo ket brao beañ kemener.
Hep ehan griat, d’e gomper
Yann-Ber ;
Hep ehan griat, d’e gomper
E kont marvailhou, keleier
Gwelloc’h evit kazetinier,
E kont marvailhou, keleier :
Teodet flour eo ar c’hemener.
Pere zimeio er c’harter
En berr,
Pere zimeio er c’harter ;
Ped loe zo ganet en pep kêr,
Pelec’h e sav trouz en tier,
Ped loe zo ganet en pep kêr :
Forz traou a oar ar c’hemener.
Piou a jach dle ha piou a zerr
Diner,
Piou a jach dle ha piou a zerr ;
Piou a zo eün, piou a zo laer,
Piou zo fur ha piou zo rikler ;
Piou a zo eün, piou a zo laer :
Da bep-hini ro ’r c’hemener.
