Pajenn:Le Garrec - Moueziou an Abardaë-Noz.djvu/51

Eus Wikimammenn
Sauter à la navigation Sauter à la recherche
Adlennet eo bet ar bajenn-mañ
— 47 —



’N eur dol en avel eur c’houez-vad
A bik kalon an tremeniad,
’N eur dol en êr he « devez mad » ;

’N eul lavaret d’ar reuzeudig,
D’ar c’hlasker-boed, d’ar c’hlanvidig,
’N eul lavaret : « C’hoarz ’ta, kêzig !

« C’hoarz ouz kuñvelez ar vuhe ;
« Aet eo kuit ar goanv didrue ;
« C’hoarz ouz madoberou Doue !

« Va c’houéz-vad a zoug madelez,
« Ha va yaouañkiz levenez,
« Ha va zae wenn pinvidigez. »

Oh ! ma chomfê bepred en êr
C’houéz-vad ha bleuñigou tener,
Ma peurbadfê ’neve amzer !

Met ar bleuñ nij gant an avel,
Ar c’houez-vad ehan da zevel ;
Bleuñ ar spern-gwenn a rénk mervel.

O wel’t bleuñ ken buhan hejet,
O wel’t c’houéz-vad ken pell nijet,
Am eus bet aliez soñjet

Er merc’hedigou yaouank flamm
Vê dilammet digant o mamm,
Merc’hedigou koant ha divlam,

Ne chom war o lerc’h netra ’bet
Nemed an éñvor, kuñv meurbed,
Deuz eur c’houézig-vad a oa bet !


————