Adlennet eo bet ar bajenn-mañ
DEKVED PENNAD
————
EN JERUZALEM : DEKVED DEVEZ
————
EUZ AN EIL LEANDI D’EGILE
————
I
Ma fri war ar gleud : n’on ket ’vit mont da Jeriko.
D’ar meurs, an 10ed a Wengolo. — War ma zu mad e savan ’vit ar beure : kousket am euz leiz-kof, kouls laret. Neal ! terzien, na viri ket ouzin da vont emberr da Jeriko !
D’iliz ar Be Santel ec’h an adarre d’ofernian, ha, mar gellan, am o unan euz auterio ar Mene Kalvar. Fe, ’n em gaout a ra an treo diouz se. Heb bean bet kalz da c’hortoz, e savan ouz auter an Itron Varia Drue, a zo tost d’al læc’h a oa bet plantet ennan kroaz hon Zalver.
Laret ganin ma oferen ha tapet ma lein, ec’h an d’am c’hampr hag eno e tanzean ’pez am bo ezom emberr evit mont en hent.
