5. Penaus ’viùché tud er hérieu,
Deustou de ol ou madeu.
Pe ne vehé ket peizanted
E tastum dehé ou boued ?
6. Petra e vehé ag en dud sé
Hag a galz aral geté,
Pe zehé d’er peizant dihan
A hadein bep plé é hran ?
7. N’hun es chet enta de gaouit méh
A hun michér é nep léh :
Dré zomb é ra en Eutru Doué,
Ou biùans d’é vugalé.
8. Red é d’emb poéniein éleih guir é,
Aveit gouni hun buhé ;
Mes ahoel ni zou digabestr :
N’hun es meit Doué aveit mestr.
9. Mar rid en huiz genemb bamdé,
Un dé zei, é guirioné,
Ma vou keméret pep tapen
Eit bleuein hun hurunen.
10. Eit hur michér bout un tamig garù
Chomamb énni bet er marù
Pél doh er hérieu miliget
Léh ma kollér en iehed.
11. Ha bremen mar dé hou chonj goulen
Più en des groeit er soñnen ?
N’é ket é mesk en dud a gér
E kavéet er sonnér.
12. Nen dé ket d’er hlask eùé, m’hou ped,
Mesk en dud vras ha disket :
Groeit é bet get ur labourér
Eit rein konfort d’é vredér.
