« Gwel du-ze, Pol, dreist ar mor braz,
« Poblou en denvalijen c’hoaz !
« Azezed e skeud ar maro
« Eneou en em goll hep distro ;
« Aberz Doue, kerz d’ho zikour,
« Treac’h e vezi d’an enebour !… »
Pol, o sevel, a gerz raktal,
Ha ganthan daouzek manac’h-all ;
Disken a reont oll en Eusa,
Leun a baianed ar gwasa.
Kentre sant Pol hag he venec’h
A ia da brezeg e peb lec’h ;
Hag aben fin ar c’hoec’hved miz
An oll a ioa ganed d’ar feiz.
