Sell, sell ! eul lapouz o nijal ac’halen ! Kea buan ’ta, Karakaz, kea da welet petra eo…
Mont a ra.
Me gave d’in edon o vont da gaout va mevel Yann ama, ha padal e ran d’eul labouz sevel diwar e neiz !!!… O ! O ! petra eo an dra-ze ?… C’houez fall a zo !… Ha yann n’ema ket ! (Sellet a ra a bep tu). A ! setu ama eun den astennet !… Yann eo, kredabl, great tro wenn gantan, hag en em roet da ober eur c’housk da c’hedal ac’hanon !… Yann !… Yann ! Grik ebet ? Maro out ?… Gwelomp ! (Stoui a ra da zellet, hag e tilamm ar mouchouar). Maro !… Yen sklas eo !!!… A ! Gwelet a ran brema petra rea va labouz dre ama ! N’eo ket red evit se besa bet e Montroulez o teski beza diviner ! Ar Breizad gwenn-ze eo a zo deuet da zieubi ar person, ha goude eo en em lakeat da skei war ar reuzeudik-ma, betek m’hen deus lazet anezan !… Mes koulskoude, daou zoudard a yoa gantan !… Petra int deuet da veza ?… Nan, tan foeltr ! n’eo ket ker sklear ha ma kave d’in !…
