(Kluch a ra, hag oc’h astenn e zorn e tiskarg eur vuredadig vihan louzou-kousket tennet gantan eus e vruched ; goudeze e tizro d’an tu kleiz.)
Eur pod-gwin !… Pebeus eurvad !… Daoust ha goullo e ve ?… (Kemeret a ra anezan). N’eo ket ! (Eva ra). Mad eo kenan !
Kea atao, te gousko dizale, va faotr !
- (Sioulded eur pennadig.)
Du-ze ez eus eur skaon e kichen an delten. Ma ’zafen di da azeza !… En em skwiza rafen nebeutoc’h, en eur ziouall kenkouls. A-hent-all, an holl a zo kousket mad dre ama…
- (Peoc’h. — ar gward a ya a-ziwar wel.)
Setu me digouezet ! N’en deus ket gwelet ac’hanon !… Brema, petra da ober ? Gwelomp da genta hag-hen n’eus riskl ebet evidon dre ama… (Sellet a ra)… Ar roue Yann an deus touet d’in e teuy d’am c’haout ama… Kals trein ’zo ganta, me gav… Daoust hag ankounac’heat en defe ?… Kemeromp hon amzer… ha dreist-oll, bezomp war evez !… (Mont a ra da guzet, hag e chomm a-zav en eun taol) A ! piou a zo erru aze ?…
