Ghennedik-ous a Vreih, en doar santel ;
É ty ha vam, miret-é ha gavel ;
Ghet deur a Vreih é ous bet badéet,
Hag, ar a dal, splann kaër é ma scrivet :
Me zo ehué mé ag en Arvorik,
Tuêm a galon ha pennek un tamik.
— Perag enta chom ker pêl doh er vro ?
— Distro d’er ghér, cleu-mé, Rieu, distro ;
Distro aben, aben, n’en dé ket mad
Eid ur Breton kol gùél a dy é dad !
Kerclous èl on te houér neb-tu n’en dé
En hun ken huêk, neb-tu ker bèr en dé,
Neb-tu ker cloar en disheol pad en han,
É léh erbet ker bourrus er gouyan.
Distro d’er ghér ! — Me vèn, aveid on-mé,
Bihuein é Breih, é Breih mervel ehué.
— Ér broïeu al, pet gùéh e mès ouilet
A pe zé d’ein chonjal é men Gùénèd,
É me mam beur, ém houh tad, ém bredér !
— Distro ehué, Rieu, distro d’er ghér ;
Dis ghet ha voès ha ghet ha vugalé !
Breih ha bro Sauz zo bredér éguilé ;
É Breih enta ne veint ket divroet.
— Péh lehuiné eit ha vam ou gùélet !
— Françès, mé-hi, deulin ou mamïeu
N’ou dès ket hoah doughet ha verhigheu !
— Te ziskoei d’hai ilis Santès-Anna,
Ha fest hur bro, gouil en Intron-Varia,
Bé er ré crean, lahet aveid ou Doué,
Ty Cadoudal, dibennet eid é Roué.
É Muzillac, te ziskoei en dachen
Rûet ghet goaid a scùillas a boulen
Bugalégheu, pautrèd lan a galon,
Avel Bayard divlam, hemb eun èl d’hon.
— Distro enta, distro d’er ghér diffré !
Breih a gav kaër gùélèt hé bugalé.
|
