Gwerz Sant Jorant

Eus Wikimammenn
Mont da : merdeiñ, klask



GWERZ SANT JORANT
______


I


   Selaouet holl, Ilis-Kaeris,
Buhe sant patron hoc’h ilis,
Buhe Sant Jorant, ho patron ;
Pedet-han gant devosion.

   Jorant na oa ket a Blouek,
En Gouanac’h ’oa bet badeet ;
En Gouanac’h ’oa bet badeet, [1]
Kement-ma, m’ho ped, intentet.

   Met en istant m’oe badeet,
Gant Doue a oe destinet
Da donet da barous Plouek,
Ha da Gergrist ’oe digaset.

   Ebars en Kerkrist eo chommet,
Ken ’arruas tud debordet ;
Ken ’arruas tud debordet,
Gant ar veinn d-eûs-han galoupet.

   Inspiret ’oa bet gant Doue
Da dont d’ann Drindet ac’hane ;
Da dont ac’hane d’ann Drindet,
Ha chomm bepred bars en Plouek.

   Bars ann Drindet a oa chommet,
Ken ’arruas ann dud debordet ;
Ken ’arruas ann dud debordet,
Gant ar veinn d-eûs-han galoupet.

   Inspiret eo bet gant Doue
Da vont da Sant Jud ac’hane,
Lec’h ma oa ur gouent newe
D’ar venec’h da bedi Doue.

   En Sant Jud pa eo arruet,
Bars ar gouent ’eo antreet ;
Goullet hen eûs en han’ Doue,
Antren bars ar gommunaute.


   Jorant a deveus bet miret,
He labour d’ehan kommandet :
Kerc’had ann dour bars ar geginn,
Ha labourad bars ar jardinn.

   Jorant d’ezhe ’n eûs respontet :
— Ma labour na differan ket,
Mar roët d’inn un heur bemde,
Wit adori ar gwir Doue.

   — El lec’h un heur ho p-eûs goulet,
Ter ho pô, Jorant, mar karet,
Ia hag ouspenn, mar desiret,
War se n’ veet ket kommandet.

   Bep ma kresk he autorite,
A kreske da bedi Doue ;
A kreske da bedi Doue,
Bep ma kresk ar gommunante.

   Seis bloaves antier a oa bet
Hep takenn c’hlao parous Plouek ;
Hep takenn c’hlao parous Plouek,
’Boe ma oa Jorant partiet.

   Met Plouegis, p’ho d-eûs klewet
Pelec’h ’oa Jorant vinniget ;
Pelec’h ’oa Jorant vinniget,
Ha klewet a oa destinet

   Gant Doue ’wit parous Plouek,
Ho frosesion d-eûs savet ;
Ho frosesion d-eûs savet,
’Wit mont, da Sant-Jud d’hen gwelet.

   Mont ’ra prosesion ha kroaz,
Tud ar barous, bihan ha braz,
Koz, iaouank, kement ’c’hell kerzet,
Hec’h a da Sant Jud d’hen gwelet.

   Bars ann hent pa oant avanset,
Kleier Sant Jud ho d-eûs klewet,
’Klewjont kleier Sant Jud o son,
Ken a ravise ho c’halon.

   Ha Sant Judis, p’ho d-eûs klewet,
D’ar gouent ez int diredet ;
D’ar gouent ez int diredet,
Hag ouz Jorant d-eûs goulennet :


   — Jorant, petra ’zo a-newe,
Ma sôn ar c’hleier er gis-se ;
Ma sôn ar c’hleier er gis-ma,
Rag na eûs den euz ho bralla ?

   Jorant d’hê hen eûs respontet :
— Arru prosesion Plouëk ;
Arru prosesion Plouëk,
Da Sant Jud, êwit ma gwelet.

   Sant Judis, p’ho deveus klewet,
Ho frosesion ’d-eûs savet ;
Ho frosesion ’d-eûs savet,
Wit dont d’ rankontr hini Plouëk.

   Ha pa ho d-eûs en saludet,
Kroas Sand Jud hag hini Plouëk,
Goulenn antren ho deveus grêt,
’Wit gwelet Jorant binniget.

   Er gouent pa ‘z int antreet,
War ho daoulinn int em strinket,
War ho daoulinn, a galon vad,
Goulenn ’gant Jorant eo mennad.

   Kriz a galon nep na oelje,
Bars ar gouent nep a vije,
’Welet ar gouent, o c’hlebia
Na gant Plouëgis o oela.

   Ar bopl a Blouëk a oele,
Jorant ’veske he daero d’ho re,
Hag hen pedent, en han’ Doue,
Da retorn da Blouëk gant-hê.

   Jorant, dre garante ’wit-hê,
’Veske he daero gant ho re,
Hag hen eûs d’ezhe respontet :
— Me ’c’h aïo ganec’h da Blouëk !

   Ho refuzi na c’hallan ket,
Rag gant Doue on destinet ;
Rag gant Doue on destinet,
Ewit chomm en parous Plouëk.

   Seis diouz a venec’h ’n eûs choazet
Ewit dont gant-han da Blouëk ;
Ewit dont gant-han da Blouëk,
Pa oa gant Doue destinet.


   Sant Judis a zo glac’haret,
Met Plouëgis ’zo konsolet ;
Met Plouëgis ’zo konsolet,
’Retorn gant ho sant da Blouek.

   War douar Plouëk p’eo arruet,
Ar glao d’ober ’zo komanset ;
Ar glao d’ober ’zo komanset,
’Wit arrosi douar Plouëk.

   Ma lârent holl, koz a iaouank :
— Heman ’zo ur mirakl patant !
Heman ’zo ur mirakl patant,
’Ra Doue en faveur ar Sant !

   Bars en Plouëk p’eo arruet,
D’ann Drindet hec’h eo bet kaset ;
D’ann Drindet hec’h eo bet kaset,
Lec’h m’oa gant Doue destinet.

   Bars ann Drindet p’eo arruet,
Ur gouent d’ehan ’zo savet ;
’Zo savet ur gouent newe,
D’hon breudeur da bedi Doue.

   Chapell ann Drindet ’oa hanwet,
Met he hano a zo chanjet,
Bourk Ilis-Kaer hec’h eo hanwet,
Ha laket dreo euz a Blouëk.

   Bars en Kergrist hag ann Drindet
E peder Jorant en Plouëk,
Met en Drindet eo douaret,
Etal ur piller ’eo lakêt.

   Kaera tensaour ’c’h eus Ilis-Kaeris !
Kaout relego Jorant ’n hoc’h ilis !
Braz ar miraklo hen eûs grêt,
En kever tud koz, tud afflijet ;

   En kever ar belerined,
Ez oant war-droad deut d’hen gwelet ;
En kever ar martoloded
War vor prest da vea beuët.

   Bea ’oa ’nezhe seis ha kant,
Hag em c’hoestljont da Sant Jorant,
Hag holl hec’h int bet preservet,
Hep ma oe hini ’n hê kollet.


   Digas a rejont ’wit presant
Da Sant Jorant ur vatimant ;
Da Sant Jorant ur vatimant,
Hag ur somm braz euz a arc’hant.

   Nep ’bedo Jorant a galon-vad,
’N defo digant Doue he vennad,
He bedenno karantezus
’Zo agreabl dirag Jesus.

   Sant Jorant ’zo karet en Plouëk,
Ha gant ann holl eo respetet,
Dre m’eo gant Doue d’hê roët,
En istant ma oe badeet.


Roët d’inn gant ann Abbad Julou,
a zo bet kure en Plouek.


─────────



  1. Gouanac’h, en français Gommenec’h, près de St-Brieuc, Côtes-du-Nord.