25. — ER GANNERÉZ PÉ GOLHERÉZ
(LA LAVANDIÈRE)
Peb unan e lar d’ein é hran mat men devér
Pé ian de vord er stér de gannein men dantér.
De gannein men dantél ha me stagelligeu
Vou lakeit de stirein pe vou dé er gouilieu.
Vou lakeit de stirein pe vou dé er pardon.
Hag é tei d’em guélet men guellikan mignon.
Aben pe vou kannet m’én lakei de séhein
Ar vég ur bodig lann pé lédet ar en drein ;
Pé doh ur bodig koed, ar er barig tostan
Émen parei en hiaul tro en dé er guellan.
M’én lakei paket mat de viret ém hrédans
Hag en kavou arlerh d’hobér en deverrans.
Monet a pe vou braù, d’en han, d’er pardonieu
Ha de gours malardé geton d’en éredeu.
Pardonieu kaer mem bro, ken joéius ha ken gé,
Get joé é me halon hou kortozan bep plé.
Ken klous él d’er gouian pe gleùan er bombard
Bleuein hra me halon é vonet d’er chervad,
Ha me lar dré me chonj : « pégours é vou me zro,
Pégours en dé kaer-sé eidein mé arriùo ? »
Rak nen des ar en doar sur erbet eurusted
Brasoh eit en hani e zou dé hou éred.
Meit me mam e lar d’ein é hon hoah iaouank mat
Aveit kemér pried ha kondui tiegéhad ;
Chetu perak koutant me séntou mat dohti,
D’en ol me hrei er lés, kemér ne hrein han̄ni.
|
