Damb de gousket e laran skuéh,
Ha mé aben d’hobér un hun,
Meit ur lon̄nig du za kentéh
De me flemmein eit me dihun.
É oé inou é men gulé,
Prest de viret t’ein me repoz,
Kousket dehi hed en dé
Ha lém hé flém doh men gortoz.
« Gorteit lon̄nig du, me « mouton » ;
Gorteit lost kourt ha gargason,
Mar gellein get me ivineu,
Tarhein hou koédennigeu. »
Guir en dra-zé, eit laret mat,
Rak pe vehen me un nuénen
Nen déhen ket de grabisat
Émen nen des ket a viren.
Ar ur boulom tri-uigent vlé
Nen des meit krohen ha jergeu,
Hag ur boufam zou lan eùé
A vos-divos ha rigolieu.
« Kerhet devat en dud iaouank
E zou ken blot ha ken tinér
Ha kentoh hoah, get eun a vank,
Choéjet ur verh lan a zoustér.
Ne pou geti nan na séhet
Meit azéein és ar hou rèvr,
Débrein, ivet ha memb kousket
Just étal bord fetan kreiz-kér. »
Sentet hi doé ? ne houian ket,
Meit péh e houian, a dra sur,
Men goalh arlerh em boé kousket
Get er brasan plijadur.
|
