Elet euz ar Barados

Eus Wikimammenn
Sauter à la navigation Sauter à la recherche
Eskopti Sant-Brieg ha Landreger
Ti René Prud’homme, 1924  (p. 24-25)


N° 14. — Elet euz ar Barados.
War an ton anavet N° 14.


1. Elet euz ar Baradoz, zellet pebes enor
A ra d’imp er Zakramant Jezus hon Redemptor :
Eur wej evit hon prenan ec’h eo bet inkarnet,
Hag evit dont d’hon magan genimp e chom bepret !

2. Mari, gwir Vam da Jezus, Mari ma Mam dener,
Ma zikouret da resev ho Mab ha ma Zalver :
Me na n-on ziouas netra, netra nemet pec’het,
Mes enoc’h ec’h esperan, o ma Mam beniget.

3. Krouer an Env, an douar, war an oter bemde,
Dre goms nerzus ar belek a zisken a neve ;
Eun Doue kalz hueloc’h evit ar firmamant,
Enem izela didan spesou ar zakramant.

4. Eun Doue na chanj james epad an ol amzer.
Eun Doue war bal e zorn a doug ar bed antier,
Enem lez gant ar belek da vezan diblaset
Evit disken e kalon ar paouran euz ar bed !


5. O mirakl ar zouezusan e-touez ar miraklou,
O burzud na hell kompren ar c’haeran sperejou :
Evit gonit kalonou ho pugale ingrad,
O maget, o ma Jezus, gant ho Korf ha ho Koad !

6. Nan, evit eur mab unik ar vam an deneran,
Biskoaz na zantas kement he c’halon o toman !
Goude ken braz karante piou a helfe refus
Konsakri e ol galon d’ho karet, ma Jezus ?

7. Mar d-eo dister kalonou ar zent hag an ele,
Evit karet eun Doue ken dign a garante,
Penos e prizet, Jezus, dre ar gomunion,
E kalonou ken sklaset dont da ober ho tron !

8. Penos kredi azean ouz tol zakr eun Doue,
Goude bezan offanset kement e vajeste ?
D’ho taoulagad, ma Zalver, na heliomp prezanti
Nemet kalonou ziouas ! leun a ingrateri.

9. Koulskoude pa hon galvet da vont ol d’ar banket,
Dre eur gomz a drugare effaset hon fec’het :
Teuet sklas hon c’halonou gant tan ho karante,
Leun a joa hag a fians e tostaïmp neuze.

10. Pebes eürustet breman pa zantin em c’halon
Jezus o vevan genin evel eur gwir vignon :
E ine gant ma ine pelloc’h enem vesko,
Gant ma goad em izili e oad pur a redo.

11. Prestet d’in ho tiou-askel, ma El-mad zoursius,
Ma ninjin evel eur goulm etre divrec’h Jezus ;
Me rei dezan ma c’halon, hen rei d’in e hini,
Gantan me a repozo e peoc’h ha dizoursi.