D’ar gwenneli

Eus Wikimammenn
Sauter à la navigation Sauter à la recherche
D. Derrien, 1902  (p. 118-119)



D’AR GWENNELI
————
War ton : Elez euz ar Baradoz
————



Lavar gwenneli bihan,
Euz a be leac’h e teuez,
Ama, kemer eunn hean,
Komz a fell d’in gan-ez,
Euz va bro muia karet
Digas a rez kelou ?
Va c’haloun a zo rannet
Ha skuill a rann daelou.

Rag adalek ar mare
M’em euz, ô follentez !
Evit keariou ken dizoue,
Dilezet va farrez,
Hed ann noz hag hed ann deiz
Ne rann nemet sonjal
Em zi soul hag em c’henvroiz,
En amzer gaer gwech’all.

E-touez ar bobl hag ann trouz
Va fenn a zo torret,
Henvel ounn ouz eul labous
Laket enn eur gaoued ;
Dont a rann da gastiza,
Gwennaat ra va bleo,
Beac’h em euz o chom em za,
Dem-zost eo va maro.


M’em bije, va gwenneli,
Evel-d-oud diouaskel,
Me nijfe kerkent d’am zi,
Eno ve kaer mervel ;
Rag e bered va farrez
Euruz ve beza
Beziet, beteg ann dervez
Euz ar varn diveza.


————