Buhez ar Sent/1837/Per, arc’hescop

Eus Wikimammenn
Sauter à la navigation Sauter à la recherche
◄   Stanislas, escop ha merzer Per, arc’hescop Gregor Nazianz   ►


An eizvet devez a viz Maë.


SANT PER, ARC’HERSCOP


————



Ar Sant-mâ a oa guinidic eus an Daufine. E dad, pehini a voa un den divar ar mæs, n’en devoa quen sonch nemet d’e zerc’hel da labourat gantâ. Mæs ar c’hrouadur yaouanc, pehini en em sante galvet da ur stad-all, a bedas e dad da ober dezàn studia, hac a reas quement ma oue laqueet er studi. Evel m’en devoa ur speret lem, c’hoant bras da zisqui, ha ma pellee bepret dious ar c’hoariou, e teuas souden habil bras. Neuse en em rentas Religius en Urs Sant Bernard ; hac e cunduas er stad-ze ur vuez quen humbl, quen mortifiet ha quer parfet, ma oue graet Abat eus ar gouent Damiet e Savoa.

O veza Abad e exerce ur charite vras en andret ar beaurien hac an oll dreminidi : o boeta hac o logea oll a ree. An Abaty a Damiet ne oa quet hebquen ul logeiz evit an estranjourien, mæs beza e voa c’hoas evit-o ur scol a silvidiguez, dre an instructionou mad a ree dezo an Abad, ha dre an exemplou bras a vertuz a velent en oll Religiuset.

An Abad-mâ, quen santel ha quen charitabl, a oue choaset evit Arc’hescop ens a Darentez. An Escopti-ze e devoa ezom eus ur Pastor vigilant, pehini a lacazze un urz vad enni : e ober a reas, ha guelet e oue e ber amser ur fervor vras, quen etouez an dud a Ilis, quen etouez ar bobl.

En em bligeout a ree ispicial oc’h instrui an dud divar ar mæs hac oc’h ober ar C’hatechis d’ar vugale. E vadou a oa muy d’ar beaurien eguet dezàn. Guelet e vige oc’h en em briva e-unan eus ar pez a vize servichet dezâ ous taul, evit e rei d’ar c’henta paour en em bresante, ha guelet e voe, goude beza roet quement en devoa, o tivisca e zillat e creiz ar goàn, evit guisca ar beaurien. Beza ez oa ouspen-ze un Æl a beoc’h e peb-lec’h. Dre e brudanç ha dre e furnez e unanas an Duc a Savoa hac ar C’hont Sant-Gil, pere a oa var ar poent da gaout bresel etrezo, hac e tilivras evel-ze ar Savoa hac an Daufine eus ar maleriou pere a heul bepret ar vresel. Ober a reas ive ar peoc’h etre ar Roue a Franç Louis seizvet hac ar Roue a Vro-Sauz, pere a edo e bresel.

Erfin, oaget a drizec vloas ha triuguent, uset dre e labourou ha dre e vortificationou, e varvas evel ma varv ar Sænt, er bloaz 1175.

Ar Miraclou bras en devoa græt en e vuez, hac ar re a c’hoarveas var e Vez, a reas e discleria Sant, c’huezec vloaz goude e varo.

REFLEXION.

Un dra gaër ê, ha cals eo, beva e peoc’h hac en ur garantez parfet gant an oll, mæs ar re o deus gallout hac autorite a dle c’hoas labourat da unani ar re a so e division pe e dissantion.

Eil Reflexion. Ar Sant-mâ a zirvoere e voed evit e rei d’ar paour, hac a zivisque e zillat e creiz ar goân evit guisca ar beaurien. Ha reï a rit-hu da viana ar rest eus ho taul d’ar beaurien ? Rei a rit-hu dezo ar pez a illit da zivoeret eus ho tillat ?

Hervez an Tadou Santel eus an Ilis, ar pez a ell ar binvidien da zioueret, a so dleet d’ar beaurien : goude ma en deus ar pinvidic quemeret e necesser eus e dra, an nemorant a so d’ar paour.