Hunvre kaer ma bue
A oa neuze kouezet,
Ma dous, ma c’harante
He doa ma dilezet ;
O tremen eun devez
E-tal he liorzig,
E kutuilhis gant evez
Eur goant a vleuennig…
— O te, da vihanan,
A vo, bleuen dispar,
An draïg diwean
A gavin em glac’har ;
Eus ma muian-karet,
Te a zigaso d’in
Sonj amzeriou dremenet…
Oh ! chom eta ganin !
Eur wechig an amzer
Pa deulin ma zello,
Daerou puilh ha tener
Warnout me a skuilho ;
Hag em c’halon kerkent,
Hunvredigez, dudi,
Evurusted diagent,
A rei d’in hirvoudi…
Ar garante gentan,
E ve laret dalc’hmad,
Eo an hini wellan,
Gwir eo, ma c’hallfe pad…
En e zempladurez
An den kez war ar bed,
A sav kant ha kant palez,
A goue goude abred !
Evel kalz a re-all,
Me a ris eun hunvre,
Ma c’halon didamall
En em roas ive ;
Breman ez on mantret,
— Turzunel a garen,
Pell diouin ez out nijet,
Na distroï ket ken ?
Kalz, kalz d’in a lavar :
— Mar n’ he deu ken en dro,
Evelti bez digar,
Ne dalv ober kanvo… —
— Tavit, tavit tudou,
C’houi n’ ho peus ket karet ?
Petramant ho kalonou
A zo holl kaledet ?
Etre an dud yaouank,
Furnez ha karante
A zo daou dra distank,
Dreist-holl hirie an de ;
Penoz ’ta e c’hallfen
Ankouaz, hep gouela,
Ha dilezel da viken
Kement a beadra ?
...........................................
… Ma c’halon zo frailhet,
Bleuen, ma bleuennig,
Dimeus ma dous karet
Komz d’in c’hoaz eun tammig…
Daoust e ha hi bepred,
Du-hont war doull he dor,
A hirvoud gant poan-spered,
Plac’hig paour an Arvor ?
|
