Bibl/Levr Nahum

Eus Wikimammenn
troet gant Le Gonidec.
L. Prud’homme, 1866  (Levr kentañ Eil levr, p. 268-270)



LEVR NAHUM.


————


I. PENNAD


Disman̄tr Niniva. Dieûb Juda.



l. Béac’h Niniva. Levr gwélédigez Nahum ann Elkesaiad.

2. Eunn Doué oazuz, ha ven̄jer eo ann Aotrou : ven̄jer eo ann Aotrou, ha leûn a frouden : ven̄jer eo ann Aotrou é kén̄ver hé énébourien ; buaneg eo é-kén̄ver hé heskinerien.

3. Habask eo ann Aotrou, ha brâz é galloud ; na laka két ann drouk da véza dinam. Ann Aotrou a gerz enn arméou hag er c’horven̄tennou, ha koabrou poultr a zô dindân hé dreid.

4. Ar môr a c’hourdrouz, hag é tizec’h anézhan̄ : ann holl steriou a drô enn eunn distrô. Basan hag ar C’harmel a goll hô c’haerded : bleûn̄ al Liban a zeû da wén̄vi.

5. Heja a râ ar ménésiou dira-z-han̄, hag ar c’hrec’hiennou a zô dispennet : ann douar, ar béd, ha kémen̄t a choum enn-han̄ a grén dirâg hé zremm.

6. Dirâg hé frouden piou a hello harpa ? ha piou a énébô oud hé vuanégez vrâz ? Hé frouden a skiñ ével ann tân, lakaad a râ ar vein da deûzi.

7. Ann Aotrou a zô mâd, hag a gen-nerz é deiz ann en̄krez : anaout a râ ar ré a laka hô géd enn-han̄.

8. Gan̄d eunn dic’hlann a dréménô é tisman̄trô al léac’h-man̄ : hag ann dévalien a iélô war-lerc’h hé énébourien.

9. Pérâg é tispac’hit-hu a-éneb ann Aotrou ? hén̄ hé-unan eo hô tispennô : na zavô két diou wéach ann en̄krez.

10. Râg ével ma en em gemmesk kévret ann drein, ével-sé en em strollon̄t kévret évid en em vézvi : hôgen hî a vézô bévézet ével kôlô krâz.

11. Ac’hanod é teûi unan hag a vennô droug a-éneb ann Aotrou, ha na rai némét fallagriez.

12. Ével-henn é lavar ann Aotrou : Ha pa ven̄t kré, ha pa ven̄t paot, koulskoudé é vézin̄t toazet, p’az ai hén̄ ébiou : da c’hlac’haret em eûz, ha n’az glac’harinn mui.

13. Bréma é tôrrinn ar walen gan̄t péhini é skôé war da gein, hag é vrévinn da chadennou.

14. Ann Aotrou a c’hourc’hémennô kémen̄t-man̄ diwar da benn : na vézô mui skiñet ével hâd da hanô : dispenna a rinn ar skeûdennou kizellet, hag ar ré deûzet eûz a dî da Zoué : hé lakaad a rinn da véz d’id, ô véza ma oud mézékéet.

15. Chétu war ar ménésiou treid ann aviéler, ann hini a embann ar péoc’h : Lîd, ô Juda, da c’houéliou, ha kennig da wéstlou : râk na dréménô mui Bélial dré-z-od : kollet eo a-grenn.


————


II. PENNAD


Ners ann armé a gerz a-énep Niniva.


1. Chétu ar skiñer a biñ dira-z-od, ann hini a zeû d’az grounna : laka évez oud ann hen̄t, ken-nerz da zargreiz, en em gréva muia ma helli.

2. Râg ann Aotrou a zistolô hé c’halloud da Jakob ; hag hé c’halloud da Israel : râg ar wasterien hô deûz hô skiñet, ha saotret hô c’hreskou.

3. Tiren hé dûd-kré a lûc’h ével tân, hé dûd-a-vrézel a zô gôlôet a vouk : é liou tân eo lerennou hé girri é deiz ann emgann, hag hô c’harrénerien a zô môrédet.

4. Ann hen̄chou a zô leûn a reûstl : ar c’hirri a stok ann eil oud égilé el leûriou-kéar : ann dremm anézhô a zô ével kleûzeûriou, hag ével luc’hed réd.

5. Nivéri a rai hé dud kréva, péré a gerzô gan̄d err braz : piña a rain̄t buan war ar vûr, hag éc’h aozin̄t lec’hiou klét.

6. Dôriou ar steriou a zô digor, hag ann templ a zô dispennet bétég ann diazez.

7. Ann dûd-a-vrézel a zô kéméret ha kaset é sklavérez : hag hé merc’hed a vézô kaset-kuît hag hî ô keina ével koulmed, hag ô krôza é gwéled hô c’haloun.

8. Ha Niniva a zô gôlôet a zour ével eul lenn : hogen hî a dec’h : Savit, savit, ha dén na zistrô.

9. Skrapit ann arc’han̄t, skrapit ann aour : n’eûz penn d’hé madou ha d’hé holl draou kaer.

10. Disman̄tret eo, ha diskaret, ha diroget : dizéc’het eo hô c’haloun, hô daoulin a grén, hô digroazel a zô diners ; hô dremmou holl a zô du pôd.

11. Péléac’h éma kéô al léoned, ha peûrvan al léonédigou, al léac’h é péhini en em denne al léon, hag hé léonédigou, ha na oa dén évid hô spoun̄ta ?

12. Al léon a géméré hag a lazé péadrâ évid hé léonédigou, hag hé leonézed, hag é leûnié hé géô a breiz, hag hé doull a skarz.

13. Chétu mé a zeû étrézég enn-od, émé Aotrou ann arméou ; ha mé a zevô da girri bétég ar môged, hag ar c’hlézé a zispennô da léonédigou : da breiz a denninn diwar ann douar, ha na vézô klevet mui mouéz da gannaded.


————


III. PENNAD


Niniva glac’haret ha kaset-da-gét.


1. Gwâ té, kéar a c’hoad, leûn a c’hevier hag a bép toullérez ; té péhini a skrâp héb éhan.

2. Klevout a rann strakl ar fouet, ha trouz ar rodou, hag ar c’hézeg a c’houirin, hag ar c’hirri a rûḻ, hag ar varc’heien a biñ.

3. Hag ar c’hlézeier ô luc’ha, hag ar gwafiou ô stérédenni, hag eul lôd braz a dûd lazet, hag eur gwall zisman̄tr : hag eul lazérez dizivez, hag ar c’horfou ô kouéza ann eil war égilé :

4. Enn abek da holl c’hadélésiou ar c’hreg fall-zé kaer ha koan̄t, péhini é deûz gréat strôbinellou, é deûz gwerzet ar brôadou gan̄d hé gadélésiou, hag ann tiadou gan̄d hé strôbinellou.

5. Chétu mé a zeû étrézég enn-od, émé Aotrou ann arméou, hag é tizôlôinn da vézégez dira-z-od, hag é tiskouézinn da noazded d’ar brôadou, ha da vézégez d’ar rouan̄télésiou.

6. Ha mé a daolô war-n-od da argarzidigésiou, hag é c’hôlôinn ac’hanod a véz, hag é likiinn ac’hanod da skouér.

7. Ha chétu pétrâ a c’hoarvézô : kémen̄d hini az kwélô, a dec’hô diouz-id, hag a lavarô : Disman̄tret eo Niniva : piou a vézô glac’haret diwar da benn ? Péléac’h é klaskinn-mé eunn dizoanier d’id ?

8. Ha gwell oud égéd Aleksandria ar boblou, péhini a zô diazézet é-kreiz ar steriou, hag é deûz dour trô-war-drô ; péhini é deûz ar môr da vadou, hag ann doureier évit muriou ?

9. Ann Étiopia a oa hé ners, hag ann Éjipt, ha kalz ré all : ann Afrika hag al Libia a oa da gen-nerz d’ézhi.

10. Ha koulskoudé hî ivé a zô bét kaset é sklavérez : hé bugaligou a zô bét flastret é penn hé ruou, taolet eo bét ar sort war hé zûd ar ré vrudéta, hag hé brasa tûd a zô bét karget a chadennou.

11. Hôgen té a vézvô, hag a vézô mézékéet : té a glaskô ken-ners digan̄d da énébour.

12. Da holl geriou kré a vézô ével ar fiez abréd ; pa hejeur ar skourrou, é kouézon̄t é genou ann hini hô debr.

13. Chétu da bobl a zeû ével gragez enn da greiz : dôriou da zouar a vézô digor d’as énébourien, ann tân a zevô da varrennou.

14. Tenn dour d’id évid ar grounadur, kréva da gréou ; kéa er prî, ha mac’h-hén̄, ha grâ brikennou gan̄t-han̄.

15. Énô é vézi loun̄ket gan̄d ann tân : diskaret é vézi gan̄d ar c’hlézé, a vévézô ac’hanod ével ar viskoul : en em stroll ével ar viskoul : en em baott ével ar c’hiḻek-raden.

16. Muioc’h a varc’hadourez éc’h eûz dastumet égét n’eûz a stéred enn én̄v : ar biskouled a oa en em lédet, hag in̄t éat-kuît.

17. Da warded a zô ével ar c’hiḻeien-raden, ha da vugaligou ével kiḻeienigou-raden, peré a arzaô war ar c’haéou pa eo ien ann amzer : hôgen pa zâv ann héol, hî a nich, ha na anavézeûr mui al léac’h é pehini édon̄t.

18. Da veserien, roué Assur, a zo bét kousket ; da brin̄sed a zô bét gourvézet : da bôbl a zô éat da guza er ménésiou, ha n’eûz den évid hô strolla.

19. Né két kuzet da en̄krez : gwall wiridig eo da c’houli : kémen̄d hini hô deûz klévet ar péz a zo c’hoarvézet gan-éz, hô deûz pounnéréet hô dourn war-n-od ; râk war biou né két bét tréménet da zrougiez é beb amzer ?